კლინიკების ასოციაციის პრეზიდენტი - ვთხოვთ უკრაინის პრეზიდენტს, უშუალოდ ჩაერთოს და დაგვეხმაროს ქართველ ექიმებს მძიმე პაციენტის, მიხეილ სააკაშვილის სიცოცხლის გადარჩენაში
ვთხოვთ უკრაინის პრეზიდენტს, რომ უშუალოდ ჩაერთოს და დაგვეხმაროს ქართველ ექიმებს მძიმე პაციენტის და უკრაინის მოქალაქის, მიხეილ სააკაშვილის სიცოცხლის გადარჩენაში, - ამის შესახებ კლინიკების ასოციაციის პრეზიდენტმა, ვილი პაჭკორიამ საქართველოში უკრაინის საელჩოს წარმომადგენლებთან შეხვედრამდე განაცხადა.
მიხეილ სააკაშვილზე საუბრისას მან აღნიშნა, რომ მსგავსი სირთულის და პოლიორგანული უკმარისობით გართულებული პაციენტის მკურნალობა საქართველოში ფაქტობრივად შეუძლებელია.
“დღეს, ქართველი ექიმები და სამედიცინო საზოგადოების წარმომადგენლები ვხვდებით უკრაინის ელჩის მოვალეობის შემსრულებელს და კონსულს. გვინდა დეტალურად გავაცნოთ პაციენტ მიხეილ სააკაშვილის ჯანმრთელობის მდგომარეობის შესახებ. ამავე დროს, გვსურს კატეგორიულად განვაცხადოთ, რომ საქართველოს პირობებში მსგავსი სირთულის, პოლიორგანული უკმარისობით გართულებული პაციენტის მკურნალობა ფაქტობრივად, შეუძლებელია. ვთხოვთ უკრაინის პრეზიდენტს, რომ უშუალოდ ჩაერთოს და დაგვეხმაროს ქართველ ექიმებს მძიმე პაციენტის, უკრაინის მოქალაქის სიცოცხლის გადარჩენაში. ექიმების ოფიციალური წერილი უკვე მზად გვაქვს, რომელსაც დღეს გადავცემთ უკრაინის ელჩის მოვალეობის შემსრულებელს”, - განაცხადა ვილი პაჭკორიამ.
