სპეციალისტებმა ჩაატარეს გამოკვლევა, გაეცნენ მასალებს, დამატებით მოითხოვეს სხვა გამოკვლევები და მთელ იმ მასალაზე დაყრდნობით, რომელიც მიიღეს, გააკეთეს დასკვნები, - ამის შესახებ მესამე პრეზიდენტის მიხეილ სააკაშვილის დედამ, გიული ალასანიამ თბილისის საქალაქო სასამართლოსთან განაცხადა.

აღნიშნული განცხადებით ალასანიამ შეაფასა იმ საერთაშორისო სამედიცინო ექსპერტების შეფასებები, რომლებიც სასამართლო პროცესის დროს დაიკითხნენ.

“დღეს სასამართლოს წინაშე გამოვიდა ორთოპედი. წინა პროცესზე სხვადასხვა დარგის საკმაოდ მაღალი დონის პროფესიონალები იყვნენ გამოსული. როდესაც მათ სთხოვენ ფიცის დადებას სასამართლოს წინაშე, მათ ფიცი უკვე დადებული აქვთ თავისი პროფესიონალიზმის გამო. ეს პროფესიონალიზმი მათთვის იმდენად მნიშვნელოვანია, რომ თუ ის შეირყა, ისინი დაკარგავენ ყველაფერს და აღმოჩნდებიან ქუჩაში. სწორედ ამიტომ, ისინი ძალიან აფასებენ ამას”, - განაცხადა გიული ალასანიამ.