სამედიცინო და ფარმაცევტული საქმიანობის რეგულირების სააგენტოს დირექტორი მადრიდში ვიზიტის ფარგლებში, ესპანეთის მედიკამენტებისა და ჯანმრთელობის პროდუქტების სააგენტოს (AEMPS) ხელმძღვანელს შეხვდა.

როგორც სააგენტოს მიერ გავრცელებულ ინფორმაციაშია ნათქვამი, მხარეებმა ფარმაკოლოგიური საშუალებების და სამედიცინო მოწყობილობების კლინიკური კვლევის საკითხები განიხილეს.

„ლიკა ჭუმბურიძემ ესპანელი კოლეგებისგან კლინიკური კვლევების რეგულირების მექანიზმების, ეთიკის კომისიის სტრუქტურისა და მუშაობის პრინციპების შესახებ დეტალური ინფორმაცია მიიღო.

რეგულირების სააგენტოს დირექტორი მადრიდში, ლა პაზის საუნივერსიტეტო ჰოსპიტალშიც იმყოფებოდა, სადაც პედიატრიული განყოფილების, I ფაზის კლინიკური კვლევების დეპარტამენტი დაათვალიერა და კვლევების ჩატარების პროცედურას ადგილზე გაეცნო.

ვიზიტის ფარგლებში, ლიკა ჭუმბურიძე ბარსელონაში, კატალონიის ონკოლოგიის ინსტიტუტშიც (ICO) იმყოფებოდა სადაც კლინიკის გენერალური დირექტორის მოადგილეს შეხვდა, კლინიკური კვლევის განყოფილება დაათვალიერა და კვლევების მიმდინარების, პროცედურებისა და სპეციფიკის შესახებ პრეზენტაციას გაეცნო.

რეგულირების სააგენტოს დირექტორის თქმით, მნიშვნელოვანია, რომ საქართველო მიუახლოვდეს ევროპულ სტანდარტებს კლინიკური კვლევების რეგულირების მიმართულებით. ლიკა ჭუმბურიძემ აღნიშნა, რომ ესპანეთი, ამ საკითხებში, ერთ-ერთი წამყვანი ქვეყანაა და მათი გამოცდილების გაზიარება მნიშვნელოვანია“, - ნათქვამია ინფორმაციაში.