ბადრი ჯაფარიძე - „ქართული ოცნების" პოლიტიკა მხოლოდ იმას ემსახურება, რომ რუსეთის ხელისუფლება იყოს კმაყოფილი და ეს კმაყოფილება დღეს ლავროვმა დაადასტურა

ეს არის სამწუხარო რეალობა და ფაქტი, რომელიც ადასტურებს, რომ "ქართული ოცნების" პოლიტიკა რუსეთის ფედერაციის მოქმედებებთან მიმართებაში, უკრაინასთან მიმართებაში, სანქციებთან მიმართებაში არის ანტიევროპული, შესაბამისად, ანტიეროვნული და ის, მხოლოდ ემსახურება იმას, რომ რუსეთის ფედერაციის ხელისუფლება იყოს კმაყოფილი, - ამის შესახებ "ლელოს" გენერალურმა მდივანმა ბადრი ჯაფარიძემ ჟურნალისტებთან განაცხადა, რითაც რუსეთის საგარეო საქმეთა მინისტრის, სერგეი ლავროვის განცხადებას გამოეხმაურა.

ბადრი ჯაფარიძის თქმით, სერგეი ლავროვმა საქართველოს ხელისუფლების მიმართ კმაყოფილება დაადასტურა.

"ჩვენ ყოველთვის ვაფასებდით დღევანდელი ქართული ხელისუფლების მოქმედებას, როგორც აცდენილს მთელი ცივილიზებული სამყაროს პოლიტიკისგან, რომელიც ემსახურება ერთ რამეს, რომ რუსეთის ფედერაციის მხრიდან დაიმსახუროს შექება და ის მოხდა რასაც ველოდით. უკვე პირდაპირ რუსეთის ხელისუფალმა შეაქო "ქართული ოცნების" ხელისუფლება. ის განცხადებები, რომელსაც "ქართული ოცნების" ხელისუფლების წარმომადგენლები აკეთებენ და ეს არის სამწუხარო რეალობა, როდესაც რუსეთის ფედერაცია, რომელიც აქებს დღეისათვის ისეთ ავტოკრატიულ რეჟიმებს, როგორიც არის სირიაში, ბელარუსში, ახლა აქებს საქართველოს ხელისუფლებას. სწორედ ეს არის საქართველოს დღევანდელი ხელისუფლების მოქმედების შეფასება, რომელიც რეალურად დაპირისპირებულია იმ პოლიტიკასთან, რასაც ახორციელებს დასავლეთი და ცივილიზებული სამყარო რუსეთის ფედერაციის მიმართ. ეს არის სამწუხარო რეალობა და ფაქტი, რომელიც ადასტურებს, რომ „ქართული ოცნების" პოლიტიკა რუსეთის ფედერაციის მოქმედებებთან მიმართებაში, უკრაინასთან მიმართებაში, სანქციებთან მიმართებაში არის ანტიევროპული, შესაბამისად, ანტიეროვნული და ის, მხოლოდ ემსახურება იმას, რომ რუსეთის ფედერაციის ხელისუფლება იყოს კმაყოფილი და ეს კმაყოფილება დღეს ლავროვმა დაადასტურა", - განაცხადა ბადრი ჯაფარიძემ.

ცნობისთვის, რუსეთის საგარეო საქმეთა მინისტრმა, სერგეი ლავროვმა მოსკოვში გამართულ პრესკონფერენციაზე განაცხადა, რომ საქართველო, მსოფლიოს სხვა ქვეყნების მსგავსად, დასავლეთის მხრიდან ზეწოლას განიცდის, "რომელიც ღიად და ურცხვად მოითხოვს რუსეთის წინააღმდეგ სანქციებთან მიერთებას".

მისივე თქმით, "ამ პატარა ქვეყანას და მის მთავრობას აქვს გამბედაობა თქვას, რომ ისინი საკუთარი ინტერესებით, ეკონომიკური ინტერესებით, იხელმძღვანელებენ და ეს შექებას იმსახურებს".

ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
Webster University Georgia-ს რექტორი ჟან პოლ ვან მარისინგი - უნივერსიტეტს აქვს პოტენციალი, რეგიონის საგანმანათლებლო ჰაბი გახდეს
ქართული პრესის მიმოხილვა 24.06.2024
„საქკაბელმა“ ბრონირებული NAYBY კაბელის წარმოება დაიწყო
4 რჩევა სამსუნგის ინჟინრებისგან თუ როგორ გამოიყენო Windfree კონდიციონერი ყველაზე ეფექტურად