გავრცელებული ინფორმაცია, რომ ვანო მერაბიშვილი ზუგდიდში, „ევროპული საქართველოს“ ზუგდიდის ორგანიზაციას შეხვდა, ტყუილია, - ამის შესახებ „ევროპული საქართველოს“ გენერალურმა მდივანმა, აკაკი ბობოხიძემ ბრიფინგზე განაცხადა.

როგორც ბობოხიძემ აღნიშნა, „ევროპული საქართველო“ არა თუ მხარს უჭერს, არამედ, საერთოდ არ ერევა სხვა პარტიების, მათ შორის, „ნაციონალური მოძრაობის“ შიდა პარტიულ საქმეებში.

როგორც პარტიის გენერალური მდივანი განმარტავს, „ნაციონალურ მოძრაობაში“ ახლა შიდა ბრძოლა მხოლოდ ბრენდის მოპოვებისთვის მიმდინარეობს, რაშიც „ევროპული საქართველო“ ჩარევას არ აპირებს.

„რამდენიმე საინფორმაციო სააგენტოს მხრიდან გავრცელდა ინფორმაცია, რომ ვანო მერაბიშვილი ზუგდიდში, „ევროპული საქართველოს“ ზუგდიდის ორგანიზაციას შეხვდა. გვინდა გავაკეთოთ განცხადება, რომ ეს არის ტყუილი. „ევროპული საქართველო“ არ მონაწილეობს სხვა პარტიის და მათ შორის, „ნაციონალური მოძრაობის“ შიდა პროცესებში და შიდა საქმეებში. მეორე - ჩვენ მიგვაჩნია, რომ „ნაციონალური მოძრაობის“ აბსოლუტურად ყველა ფრთა, რომელიც დღეს ერთმანეთს უპირისპირდება, დაცლილია პოლიტიკური შინაარსისგან, დაცლილია პოლიტიკურ ღირებულებებს შორის უთანხმოებებზე და განსხვავებებზე ბრძოლისაგან და რეალურად, მიმდინარე ბრძოლა ბრენდის მხარდამჭერთა ხმებზე ნადირობას წარმოადგენს,“ - განაცხადა აკაკი ბობოხიძემ.