გია ვოლსკი -  არ შეიძლება საქართველო შეიარაღებას ან სამხედრო დანიშნულების საქონელს აწვდიდეს უკრაინას, ეს ომში ჩართვის ტოლფასია - ელექტროგენერატორებით დაწყებული, ბავშვის ხილფაფებით დამთავრებული, უამრავი პროდუქცია გვაქვს მიწოდებული

არ შეიძლება საქართველო შეიარაღებას ან სამხედრო დანიშნულების საქონელს, პროდუქციას აწვდიდეს უკრაინას, ვინაიდან ეს ომში ჩართვის ტოლფასი გადაწყვეტილება იქნება, - აღნიშნული განცხადება ჟურნალისტებთან „ქართული ოცნების“ ერთ-ერთმა ლიდერმა გია ვოლსკიმ გააკეთა.

ვოლსკის აზრით, უკრაინისთვის „ბუკების“ მიწოდების საკითხით დაწყებული, საველე ჰოსპიტლის თემით დასრულებული და ამაზე ღიად ლაპარაკი პროვოკაციული ქმედებაა.

„ბევრჯერ მითქვამს და გავიმეორებ: მიუხედავად იმისა, რომ ანდრეი კასიანოვი თავად არის რაღაც არაადეკვატური განცხადებების მოყვარული ადამიანი - არაადეკვატურია მისი ქცევა და განცხადებები, ეს კასიანოვის განცხადება არ არის. ეს არის ადამიანთა ჯგუფის განცხადება, მათი პოზიციის გახმოვანება, რომ თურმე საქართველოს თავდაცვითი შეიარაღება არ სჭირდება. საქართველოს თურმე არაფერი სჭირდება, თუნდაც ის მწირი რესურსი, რაც თავდასაცავად არის აუცილებელი. საქართველო თავად არის ოკუპირებული ტერიტორიების მქონე ქვეყანა, რაც იმ ხელისუფლებამ ჩაიდინა და დაუშვა, რომლის მოკავშირეები დიდი რაოდენობით უკრაინის ხელისუფლებაში არიან.

არ შეიძლება, რომ „ნაციონალურმა მოძრაობამ“ და უკრაინაში მათმა მოკავშირე პოლიტიკოსთა ჯგუფმა საქართველოს ეროვნულ ინტერესებს გადასძლიოს. ჩვენი ეროვნული ინტერესია უკრაინას გვერდით ვედგეთ, უკრაინის მხარდასაჭერად ჩვენი პოლიტიკური პოზიცია იყოს უცვლელი და მყარი, ჰუმანიტარული დახმარება იყოს მნიშვნელოვანი და ხელშესახები, მაგრამ არა სამხედრო დანიშნულების საქონელი და სხვადასხვა ნივთები.

საქართველოს ტერიტორიების ნაწილი არის ოკუპირებული და ოკუპანტი ქვეყნის მხრიდან საშიშროება არსებობს, დღევანდელ დღემდე მუდმივად არსებობდა და ხვალაც იარსებებს. არ შეიძლება საქართველოსგან მისი ისედაც მწირი რესურსების მიწოდებას ითხოვდნენ იქნება ეს კასიანოვი, დანილოვი თუ უკრაინის ხელისუფლების სხვა წარმომადგენელი. რატომ ჩათვალა კასიანოვმა, რომ დასავლეთის - მოკავშირე ქვეყნების რესურსი, უკრაინას სამხედრო ჰოსპიტალი მიაწოდოს უფრო ნაკლებია, ვიდრე საქართველოსი?! რა იცი, საქართველოს ხვალ რა დასჭირდება?! როგორ შეიძლება გარკვეულ მატერიალურ რესურს საქართველოსგან ითხოვდე, როდესაც იცი, რომ შენთან ერთად ჰააგის ტრიბუნალში უჩივლა რუსეთს იმის გამო, რასაც უკრაინაში სჩადის, როდესაც იცი, რომ შენთან ერთად მთელი რიგი საერთაშორისო ორგანიზაციებიდან რუსეთის გარიცხვას მოაწერა ხელი, შეუერთდა არაერთ რეზოლუციას და განცხადებას, ელექტროგენერატორებით დაწყებული, ბავშვის ხილფაფებით დამთავრებული, უამრავი პროდუქცია აქვს მიწოდებული. როგორ შეიძლება მუდმივად საქართველოზე ამბობდე, რომ ის რუსეთის ინტერესებს ითვალისწინებს?! თუმცა რა არის გასაკვირი - აგერ ზელენსკიმ სწორედ საყვედურით მიმართა დასავლელ პარტნიორებს, რომ სამხედრო დახმარება არასაკმარისია. ამ ვითარებაში კი, 2 000 კილომეტრით მოშორებულ, ნაწილობრივ ოკუპირებულ საქართველოს რომ მუდმივად, ყოველ დღე უწყობ პროვოკაციას, რომ შიდა დაძაბულობა იყოს შენარჩუნებული, ეს არა თუ პარტნიორული საქციელია, ეს არის მტრული დამოკიდებულება საქართველოს როგორც ქვეყნის და როგორც შენი პოტენციური პარტნიორის და თანამშრომლის მიმართ, ეს არის მტრული დამოკიდებულება მისი ხალხის მიმართ - ის რაც კასიანოვმა განაცხადა", - განაცხადა ჟურნალისტებთან გია ვოლსკიმ.

რამაზ საყვარელიძე - საქართველოს რუსეთისკენ მოძრაობის მოტივს ვერ ვხედავ, სამაგიეროდ ვხედავ რუსეთის მოტივს, დაარწმუნოს ყველა, რომ საქართველო მისი ისეთი კარგი მეგობარია, რომ მოსკოვი ფრენებსაც კი აღადგენს
ნათია სონღულაშვილი - ყველა ის გარანტია, რომელსაც სპეციალური საგამოძიებო სამსახური არასათანადო მოპყრობის მსხვერპლს სთავაზობს, გაზრდის მსხვერპლის ნდობას სამსახურისა და თითოეული გამომძიებლის მიმართ
ქართული პრესის მიმოხილვა 06.02.2023
თეონა ლავრელაშვილი - ევროკავშირის ანგარიში თვითკმაყოფილებად არ უნდა ვაქციოთ, მთავარი „საშინაო დავალება“ არის ევროკავშირის 12 რეკომენდაციის მაქსიმალურად შესრულება
მსოფლიო ჩემპიონატის წინ სილქნეტი სათხილამურო ფედერაციასთან ერთად მედიას შეხვდა
კრედო ბანკსა და ევროპის რეკონსტრუქციისა და განვითარების ბანკს (EBRD) შორის ქართული ბიზნესების მხარდასაჭერად ხელშეკრულება გაფორმდა
„საქართველოს საბანკო ასოციაცია“ განცხადებას ავრცელებს
რეკრუტინგის პირველი ქართული აპლიკაციის - Awork Business App-ის პრეზენტაცია 2 თებერვალს, King David-ში გაიმართა
Apple-ისთვის პროგრამული ენის შესასწავლად BTU IOS LAB-ში საბავშვო კოდინგის კურსი დასრულდა
ბორუსან კატმა კოლეჯ „სპექტრში“ სასწავლო ცენტრი გახსნა