ჯოზეფ ბორელი - იმედი მაქვს „რამშტაინის“ შეხვედრაზე უკრაინისთვის ტანკების გაგზავნის გადაწყვეტილებას მიიღებენ
ევროკავშირის უმაღლესი წარმომადგენელი საგარეო პოლიტიკისა და უსაფრთხოების საკითხებში, ჯოზეფ ბორელი აცხადებს, რომ ზოგიერთი ევროპული ქვეყანა მზადაა უკრაინაში მძიმე ტანკების გასაგზავნად და იმედოვნებს, რომ მათი მიწოდების გადაწყვეტილებას გერმანიაში თავდაცვის მინისტრების დღევანდელ შეხვედრაზე მიიღებენ.
„ეს არის დისკუსია, რომელიც დღეს „რამშტაინის“ შეხვედრაზე გაიმართება და რომელზედაც ევროკავშირი იქნება წარმოდგენილი. ჩვენ უნდა მივცეთ უკრაინას საჭირო იარაღი არა მხოლოდ მოსაგერიებლად, რასაც ისინი აკეთებენ, არამედ ტერიტორიის დასაბრუნებლადაც. ვფიქრობ, რომ უკრაინას სჭირდება საბრძოლო იარაღი და მძიმე ტანკები, რაც მან მოითხოვა. ზოგიერთი ევროპული ქვეყანა მზად არის მიაწოდოს და იმედი მაქვს, რომ ამ გადაწყვეტილების მიღება მოხდება“, - აღნიშნა ჯოზეფ ბორელმა.
შეგახსენებთ, გერმანიაში „რამშტაინის“ ფორმატში ნატო-სა და სხვა ქვეყნების თავდაცვის უწყებების შეხვედრა მიმდინარეობს. შეხვედრას უკრაინის თავდაცვის მინისტრი, ოლექსი რეზნიკოვიც ესწრება. მონაწილეებს ვიდეო ჩართვის საშუალებით უკრაინის პრეზიდენტმა, ვოლოდიმირ ზელენსკიმ მიმართა.
