„საქართველოს ბიზნეს ასოციაციისა“ და გარემოს დაცვისა და სოფლის მეურნეობის სამინისტროს წარმომადგენლების შეხვედრის მთავარი საკითხი ბენზინის შენახვისა და დისტრიბუციისას მავნე აირების შემცირება იყო

„საქართველოს ბიზნეს ასოციაციის“ ინფორმაციით, ასოციაციის წევრი ნავთობკომპანიები საქართველოს გარემოს დაცვისა და სოფლის მეურნეობის სამინისტროს წარმომადგენლებს შეხვდნენ. ასოციაციის ცნობით, შეხვედრის მთავარი თემა ბენზინის შენახვა და დისტრიბუციისას მავნე აირების შემცირება იყო.

„საქართველოს ევროინტეგრაციის დღის წესრიგით გათვალისწინებული ვალდებულებიდან გამომდინარე, ბენზინის შენახვისა და დისტრიბუციის დროს აქროლადი ორგანული ნაერთების გაფრქვევის შემცირების მიზნით მისაღები ნორმატიული აქტის განხილვა იყო საქართველოს ბიზნეს ასოციაციის წევრი ნავთობკომპანიებისა და საქართველოს გარემოს დაცვისა და სოფლის მეურნეობის სამინისტროს წარმომადგენელთა შეხვედრის მთავარი საკითხი.

შეხვედრაზე, მინისტრის მოადგილე ნინო თანდილაშვილმა და სამინისტროს წარმომადგენლებმა ასოციაციის წევრ კომპანიებს ნორმატიული აქტის პროექტით განსაზღვრული პრიორიტეტული მიმართულებები გააცნეს. მათ შორის, შეხვედრაზე ევროდირექტივის ეროვნულ კანონმდებლობაში ასახვის სამართლებრივ და ტექნიკურ დეტალებზე, დანერგვის ვადებსა და რეგულაციის დანერგვის ზეგავლენის (RIA) მოკვლევის შედეგებზე ისაუბრეს”, - ნათქვამია გავრცელებულ ინფორმაციაში.

ასევე, „საქართველოს ბიზნეს ასოციაციის“ ცნობით, ნავთობკომპანიების წარმომადგენლებმა ყურადღება გაამახვილეს ნორმატიული აქტის ეტაპობრივი დანერგვის ტექნიკურ შესაძლებლობებზე, მათგან გამომდინარე არსებულ გამოწვევებსა და მათი გადაჭრის გზებზე.

„გარემოს დაცვის თვალსაზრისით, ბენზინის შენახვისა და დისტრიბუციის დროს წარმოშობილი აქროლადი აირების რეგულირება მნიშვნელოვანი მიმართულებაა. აუცილებელია, ინდუსტრიასა და სახელმწიფოს შორის მსგავსი კომუნიკაცია, ვინაიდან, სწორედ ამგვარი კონსულტაციების შედეგად აღიქმება დარგში არსებული სიტუაცია. განისაზღვრება თუ რისი საშუალება აქვს ბიზნესს ობიექტური, ტექნიკური შესაძლებლობებიდან გამომდინარე და დასახულ მიზნებს რა დროში შეიძლება მივაღწიოთ. საერთო ამოცანის შესრულება გულისხმობს, ერთი მხრივ, საქართველოს მისწრაფებას, პირნათლად შეასრულოს ევროდირექტივებით გათვალისწინებული ვალდებულებები და მეორე მხრივ, აღნიშნული გონივრულ ვადაში, ბიზნესის ინტერესების დაცვითა და ოპტიმალური დანახარჯებით განახორციელოს“, - განაცხადა საქართველოს ბიზნეს ასოციაციის აღმასრულებელმა დირექტორმა ლევან ვეფხვაძემ.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს