„ევროპული საქართველოს“ წევრის, აკაკი ბობოხიძის განცხადებით, ზუგდიდისა და რუსთავის საკრებულოებში მართვის ბერკეტი „ნაციონალურ მოძრაობას“ და გიორგი გახარიას პარტია „საქართველოსთვის“ აქვს და არ არსებობს არანაირი არგუმენტი იმისა, თუ რატომ ვერ მუშაობს ეფექტურად ეს ორი საკრებულო.

როგორც მან პარტიის ოფისში გამართულ ბრიფინგზე განაცხადა, აუცილებელია, რომ საკრებულოებში სარევიზიო კომისია იქნებოდეს და მერიების მუშაობას ზედამხედველობას უწევდეს.

„ამ ორ საკრებულოში მართვის ბერკეტები სწორედ „ნაციონალური მოძრაობის“ და გახარიას პარტიის ერთობას აქვს, ხოლო „ქართული ოცნება“ არის ოპოზიციაში. ამ ორ საკრებულოში არ არსებობს არანაირი არგუმენტი იმისა, თუ რატომ ვერ მუშაობს ეფექტურად საკრებულო, არა ოპოზიცია, არა დეპუტატები, არამედ საკრებულო, იმიტომ, რომ ამ ორ საკრებულოში საკრებულოს სწორედ „ნაციონალური მოძრაობის“ და გახარიას გაერთიანება წარმოადგენს,“ - განაცხადა ბობოხიძემ.

შეგახსენებთ, „ევროპული საქართველოს“ ოფისში გამართულ ბრიფინგზე პარტიის წევრებმა განაცხადეს, რომ ზუგდიდის ოპოზიციურ საკრებულოს მერიისა და მისი სტრუქტურული ერთეულების სარევიზიო საქმიანობა არ განუხორციელებია, რუსთავის საკრებულოს კი სარევიზიო კომისია არ შეუქმნია, რის შედეგადაც მერიის შემოწმება არ განხორციელებულა.

ცნობისთვის, ორივე საკრებულოში უმრავლესობას ოპოზიციური პარტიები წარმოადგენენ. ზუგდიდის საკრებულო ენმ-ს 21, "გახარია - პარტია საქართველოსთვის" 3, ხოლო "ქართული ოცნების" 20 დეპუტატითაა წარმოდგენილი, ხოლო რუსთავის საკრებულოში, ენმ-ს 16, "გახარია - პარტია საქართველოსთვის" 3 და "ქართული ოცნების" 17 დეპუტატია.