საბურთალოს რაიონში, სოფელ დიღომში, ჩარგალეთის ქუჩაზე სარეაბილიტაციო სამუშაოები დაიწყო.

თბილისის მერიის მიერ გავრცელებული ინფორმაციით, აღნიშნულ ქუჩაზე, ამ დრომდე, მოსახლეობას გრუნტიან გზაზე გადაადგილება უწევდა. მათივე ინფორმაციით, სამუშაოების ფარგლებში, 2 050 კვ.მ ფართობზე ასფალტის ორფენიანი საფარი დაიგება.

მიმდინარე პროცესს საბურთალოს რაიონის გამგებელი გაიოზ ვასაძე გაეცნო და ადგილობრივ მოსახლეობას შეხვდა.

„საბურთალოს რაიონში საგზაო ინფრასტრუქტურის მოწესრიგებას ვაგრძელებთ. ამჯერად, სამუშაოები სოფელ დიღომში დავიწყეთ, სადაც აქამდე ასფალტის საფარი არ არსებობდა. ასეთი ქუჩები ჩვენთვის პრიორიტეტულია და მომავალშიც არაერთ მსგავს პროექტს განვახორციელებთ“, - განაცხადა გაიოზ ვასაძემ.

საბურთალოს რაიონის გამგეობის ცნობით, პროექტისთვის ადგილობრივი ბიუჯეტიდან 190 000 ლარია გამოყოფილი.