საერთაშორისო აუდიტორულმა კომპანიამ, ე.წ „დიდი ოთხეულის“ წევრმა KPMG-მ „საპარტნიორო ფონდის“ ფინანსური აუდიტი დაასრულა, რომლის მიხედვით, ფონდის წმინდა მოგებამ 2021 წელს 134.9 მილიონი ლარი შეადგინა.

ამის შესახებ ინფორმაციას „საპარტნიორო ფონდი“ ავრცელებს.

მათივე ცნობით, „საპარტნიორო ფონდის“ 2021 წლის კონსოლიდირებული ფინანსური ანგარიშგების მიხედვით, ფონდის ყველა ძირითადი ფინანსური მაჩვენებელი პოზიტიურია.

„ფონდის შემოსავლები 13%-ით გაიზარდა და 1.6 მილიარდ ლარს გადააჭარბა, ხოლო ჯამური ვალდებულებები 247.9 მილიონი ლარით შემცირდა, რაც წინა წელთან შედარებით 8%-იან კლებას შეადგენს. ამასთანავე, 448.4 მილიონი ლარით არის შემცირებული წმინდა ფინანსური ხარჯები.

აღსანიშნავია, რომ აუდიტორული დასკვნის თანახმად, „საპარტნიორო ფონდის“ მხოლოდ საინვესტიციო საქმიანობიდან მიღებულმა წმინდა მოგებამ, სახელმწიფო შვილობილი კომპანიების გარდა, 1.2 მილიონი ლარი შეადგინა“,- აღნიშნულია გავრცელებულ ინფორმაციაში.