პაატა მანჯგალაძე - არ მინდა, რომ ოპოზიციური პარტიის თავმჯდომარე იყოს ადამიანი, რომელიც იტყვის - „მე ვარ და ჩემი ნაბადი“ და მარტო 5 ნომერი მაინტერესებსო
ვისურვებდი, „ნაციონალური მოძრაობის” თავმჯდომარის არჩევნებში გაიმარჯვოს კანდიდატმა, რომელიც ვიწროპარტიულ ჩარჩოებს გასცდება და იტყვის, რომ ქვეყნის ინტერესებისთვის მთავარი ამოცანა ერთიანი ოპოზიციური ფრონტია, - ამის შესახებ ჟურნალისტებს “სტრატეგია აღმაშენებლის” წევრმა პაატა მანჯგალაძემ განუცხადა.
მისივე თქმით, თუ პარტიულ ინტერესებზე მაღლა არ დადგებიან, ყველაზე მთავარს - საქართველოს და მის თავისუფლებას დავკარგავთ.
„ღირსეულებს შორის ღირსეული გაიმარჯვებს. თუ მკითხავთ, რომელი კანდიდატის გამარჯვებას ვისურვებდი, მინდა, გაიმარჯვოს კანდიდატმა, რომელიც ვიწროპარტიულ ჩარჩოებს გასცდება და იტყვის, რომ ქვეყნის ინტერესებისთვის მთავარი ამოცანა ერთიანი ოპოზიციური ფრონტია. თუ პარტიულ ინტერესებზე მაღლა არ დავდგებით, დავკარგავთ ყველაზე მთავარს - საქართველოს და მის თავისუფლებას. ეს პათეტიკა არაა. ნამდვილად ვიცი, რომ „ქართული ოცნება“ საქართველოს უპირებს რუსეთ-ბელარუსის კავშირში შეიყვანოს. ნამდვილად არ მინდა, რომ ერთ-ერთი ოპოზიციური პარტიის თავმჯდომარე იყოს ადამიანი, რომელიც იტყვის - „მე ვარ და ჩემი ნაბადი“ და მარტო 5 ნომერი მაინტერესებს, მეტი არაფერიო“,- განაცხადა პაატა მანჯგალაძემ.
