არსებითი ის კი არაა, „ნაციონალური მოძრაობა” დაიშლება თუ არა, მთავარია, რომ თავიანთი მოქმედებებით „ოცნებისთვის“ ძალაუფლების შენარჩუნებას უწყობენ ხელს, - ამის შესახებ პარტია „საქართველოსთვის“ დეპუტატმა მიხეილ დაუშვილმა ჟურნალისტებს განუცხადა.

მისი თქმით, „ნაციონალური მოძრაობა“ საკუთარი ქმედებებით „ქართულ ოცნებას” აძლიერებს.

„ჩემთვის მთავარია ის, რომ „ნაცმოძრაობა“ მიუხედავად იმისა, დაიშლება თუ არა, იმით, რასაც ბოლო თვეებია აკეთებენ და როგორც არჩევნების შემდეგ განვითარდება მოვლენები, ხელს შეუწყობენ “ოცნების” გაძლიერებას. შიგნით ვერ გაურკვევიათ, ვინ ოლიგარქია, ვინ არაფორმალური მმართველი, ვინ ვის აგინებს და ვინ ვის რა კომპრომატს უმზადებს - ამით ვინ ძლიერდება? - ამით ერთადერთი “ოცნება” ძლიერდება”, - განაცხადა მიხეილ დაუშვილმა.

დაუშვილმა ასევე უპასუხა კითხვას იმის შესახებ, რომ გიორგი მუმლაძე საკრებულოებში “ნაციონალური მოძრაობისა” და პარტია “საქართველოსთვის” გაერთიანებაზე საუბრობს.

მიხეილ დაუშვილის თქმით, ეს “სასაცილოა” და მუმლაძის მიზანი ხმების მოგროვებაა.

“ისინი ერთმანეთთან არ არიან გაერთიანებულები და ჩვენ ვისთან გავერთიანდებით? გიორგი მუმლაძეს გადასარევად აუთვისებია “ოცნების” პროპაგანდა. როგორც ჩანს, ამით ცდილობს რაღაც ხმები მოაგროვოს. ჩვენ რომ ვინმესთან კოალიციის შექმნა გვდომებოდა, ამას გავაკეთებდით. “ნაციონალურ მოძრაობასთან” კოალიცია ჩვენთვის აბსოლუტურად მიუღებელი იყო, მაგრამ მეორე მხრივ, ასევე დაუშვებელი იყო, რომ საკრებულოებში საქმიანობა გაჭედილიყო. ამიტომ დავაყენეთ ჩვენი კანდიდატები თავმჯდომარეებად. მუმლაძეს ჰკითხეთ, სისულელეებს რატომ საუბრობს - მე არ ვიცი”, - განაცხადა მიხეილ დაუშვილმა.