საქართველოს გენშტაბის ყოფილი ხელმძღვანელი და „ჯეოქეისის“ მკვლევარი ვახტანგ კაპანაძე უკრაინას ურჩევს, რუსებს მეორე თაობის ომში არ აჰყვეს ანუ პოზიციურ თავდაცვაზე ბევრი ძალა არ დახარჯოს. ამის შესახებ ვახტანგ კაპანაძემ „პალიტრანიუსის“ გადაცემა „ნიუსრუმში“ ისაუბრა.

მან ასევე აღნიშნა, რომ ის ტანკები, რომლებიც უკრაინამ დახმარების სახით მიიღო, ნაკლებად პრიორიტეტულ მიმართულებებზე არ უნდა გაფანტოს და „ორ დარტყმით დაჯგუფებაში“ უნდა გააერთიანოს.

„ჩემი აზრით, უკრაინაში უნდა შეიქმნას ორი დარტყმითი დაჯგუფება, რომელიც შეძლებს კონტრდარტყმის განხორციელებას მას შემდეგ, რაც მის მიერ ახლა მიღებული ტექნიკა ინტეგრირებული იქნება უკრაინის შეიარაღებულ ძალებში ანუ დარტყმით დაჯგუფებებში იქნება ინტეგრირებული. მე ძალიან არ მინდა, რომ უკრაინელებმა ეს ძალიან კარგი დახმარება დაქსაქსონ და გაფანტონ ბახმუტის, სოლედარის და ასეთ მიმართულებებზე ანუ სამხედრო თვალსაზრისით არაფრის მომცემ რაიონებზე, სადაც შეიძლება უმაგისოდაც შეძლონ ამოცანის შესრულება.

ძალიან ძნელია ადამიანი სანგრიდან ამოიყვანო და კონტრტშეტევაზე წაიყვანო, რომელიც გადაღლილია, ამიტომ კონტრშეტევას ახორციელებს დასვენებული, მეორე ეშელონი ან რეზერვი, ის ხალხი, რომელიც არის დასვენებული, რომელიც ბრძოლით არ არის გადაღლილი, ე.წ. „ახალი სისხლი“,- განაცხადა ვახტანგ კაპანაძემ.

მისივე თქმით, ცოტა ხანში უკრაინის მხრიდან ავიაგამანადგურებლების საჭიროებაზეც დაიწყება საუბარი.

„დღეს მივედით იქამდე, რომ უკრაინას სჭირდება უკვე დაკავებული ტერიტორიების გათავისუფლება ანუ მას სჭირდება კონტრშეტევითი შესაძლებლობები, კონტრშეტევითი შესაძლებლობები, რა თქმა უნდა, არის ჯავშანტექნიკა. თუმცა მას სჭირდება ჰაერიდან დაცვა. ამდენად მალე დაიწყება საუბარი ახლო მხარდაჭერის საჰაერო საშუალებებზე, ავიაგამადგურებლებზე, რომლებიც, ალბათ, გამოჩნდება უკრაინის ცაზეც“,- განაცხადა კაპანაძემ.

რაც შეეხება, ფრონტზე ამჟამად არსებულ თანაფარდობას ტანკების მხრივ, გენშტაბის ყოფილმა ხელმძღვანელმა აღნიშნა, რომ დაახლოებით, 2:1-თან შეფარდებაა რუსების სასარგებლოდ ტანკების რაოდენობით, მაგრამ ზოგადად 12 000 ტანკი ჰყავს რუსეთს.