უპირატესობა არის მყარი და ლევან ხაბეიშვილი იქნება გარანტი „ნაციონალურ მოძრაობაში“ იმ დღის წესრიგის, რომელიც საქართველოს კეთილსინდისიერ მოქალაქეს ევროპული პერსპექტივის რეალიზებას მოუტანს, - ამის შესახებ „ნაციონალური მოძრაობის“ თავმჯდომარის, ლევან ხაბეიშვილის წარმომადგენელმა, ლაშა ფარულავამ განაცხადა.

მისივე თქმით, არჩევნებში ლევან ხაბეიშვილის გამარჯვება „ნაციონალური მოძრაობის“ მხარდამჭერების გამარჯვებაა.

„ჩვენ ვაცხადებდით, რომ 30 000 მხარდამჭერი გვყავდა. 21 000 დარეგისტრირდა. ლევან ხაბეიშვილმა პირველივე ტურში გაიმარჯვა. უპირატესობა არის მყარი და ლევან ხაბეიშვილი იქნება გარანტი „ნაციონალურ მოძრაობაში“ იმ დღის წესრიგის, რომელიც საქართველოს კეთილსინდისიერ მოქალაქეს ევროპული პერსპექტივის რეალიზებას მოუტანს და რაც მთავარია, ჩვენ დავიწყებთ მიხეილ სააკაშვილის სიცოცხლის, ჯანმრთელობის და მისი ჰუმანიტარული მიზნით გადაყვანისთვის ბრძოლას. ეს გამარჯვება არის „ნაციონალური მოძრაობის“ ყველა მხარდამჭერის გამარჯვება. ეს არის პირველ რიგში, იმ პასუხისმგებლობის ერთიანობა, რაც კომისიაში იყო. მე მინდა კომისიის ყველა წევრს მადლობა გადავუხადო იმ შრომისთვის, რომელიც გასწიეს,“ - განაცხადა ლაშა ფარულავამ.

შეგახსენებთ, "ნაციონალური მოძრაობის" თავმჯდომარე ლევან ხაბეიშვილი გახდა. მან ხმების 52.58%-ს მოიპოვა. რაც შეეხება სხვა კანდიდატებს - ნიკა მელიამ ხმების 40% მიიღო, გიორგი მუმლაძემ 3.68%, ნონა მამულაშვილმა კი 3.73%. ენმ-ს თავმჯდომარის არჩევნებში მონაწილეობა 41 264 პირმა მიიღო.