ხაბეიშვილი მეტ დესტრუქციას და შეცდომას მოუტანს პარტიას - ესაა დასასრულის დასაწყისი, ვიტყოდი, ამ პოლიტიკური პარტიის დასასრულის წინ წასული ფაზა,- ამის შესახებ ადამიანის უფლებათა კომიტეტის თავმჯდომარე მიხეილ სარჯველაძემ განაცხადა, რითაც „ნაციონალური მოძრაობის“ არჩევნებში ლევან ხაბეიშვილის გამარჯვებას გამოეხმაურა.

მისივე თქმით, დესტრუქცია წარმატების მომტანი ვერ იქნება, რადგან ეს საზოგადოებამ შეაფასა, როგორც შეცდომა.

„ლევან ხაბეიშვილი გახდა პარტიის თავმჯდომარე, რას შეცვლის და რას მოუტანს - ალბათ, იმას, რითაც იყო წარდგენილი წინასაარჩევნო მიმართულებით: მეტ დესტრუქციას, მეტ შეცდომას. ფაქტია, მიმართულება, რაც არჩეული ჰქონდათ წინასაარჩევნოდ ამ დაპირისპირებულ ჯგუფებს, რომ მეტი დესტრუქცია გაეჩინათ და ის ქვეყნისთვის და საზოგადოებისთვის შეეთავაზებინათ, ეს ხაზი იქნება შემდგომი მიმართულება, რაც მთლიანად საზოგადოებამ შეაფასა, როგორც შეცდომა. ამ მიმართულებით განვითარება ამ პოლიტიკურ პარტიას, არ მგონია, რომ დიდ წარმატებას უქადდეს, ეს არის ალბათ, ყველაზე მთავარი ფაქტორი, რაც გააჩინა ხაბეიშვილის გამარჯვებამ შიდაპარტიულ არჩევნებში.

ეს არ მგონია, რაიმე წარმატების მომტანი იყოს პარტიისთვის, უფრო მეტად შეგვიძლია ვთქვათ, რომ ეს არის დასასრულის დასაწყისი, ვიტყოდი დასასრულის წინ წასული ფაზა ამ პოლიტიკური პარტიისა”, - განაცხადა სარჯველაძემ.

სარჯველაძე გამოეხმაურა იაგო ხვიჩიას განცხადებასაც, რომ არჩევნები გაყალბდა და შესაძლოა, ხმა სხვა პარტიის, მათ შორის, „ქართული ოცნების“ წევრებს თუ ამომრჩევლებსაც მიეცათ, როგორც ეს სანდრო რაქვიაშვილმა და ვახტანგ მეგრელიშვილმა გააკეთეს.

როგორც სარჯველაძე აღნიშნავს, უცნაურად გამოიყურება, რომ სხვა პარტიის წევრები იმ პარტიის თავმჯდომარეს ირჩევენ, რომლის წევრებიც თვითონ არ არიან, თუმცა, თავად დაინტერესებული არ არის, რამდენად ლეგიტიმური იყო არჩევნები.

„მე ნამდვილად არ მიმიცია ხმა. ყველას თავისი მოსაზრება აქვს და ირჩევს, რა საკითხით იყოს დაინტერესებული, სიმართლე გითხრათ, დიდად ეს საკითხი არ მაინტერესებს, რამდენად ლეგიტიმურად ან სწორად წარიმართა პროცედურები. ისე კი, ცოტა უცნაურად გამოიყურება, რომ სხვა პარტიის წევრები იმ პარტიის თავმჯდომარეს ირჩევენ, რომლის წევრებიც თვითონ არ არიან”, - განაცხადა სარჯველაძემ.

ცნობისთვის, „ნაციონალური მოძრაობის" თავმჯდომარე ლევან ხაბეიშვილი გახდა. ხაბეიშვილმა ხმების 52.58%-ს მოიპოვა. რაც შეეხება სხვა კანდიდატებს - ნიკა მელიამ ხმების 40% აიღო, გიორგი მუმლაძემ 3.68%, ნონა მამულაშვილმა კი 3.73%.