როდემდე უნდა გაგრძელდეს ეს შოუ, სასამართლო - მივმართავ მოსამართლეს, დადექით ისტორიის სწორ მხარეს ­და მიშას სამკურნალოდ გადასვლის საშუალება რაც შეიძლება მალე მიეცით, - ამის შესახებ საქართველოს ყოფილი პრეზიდენტის, მიხეილ სააკაშვილის ძმამ, გიორგი სააკაშვილმა ჟურნალისტებს თბილისის საქალაქო სასამართლოში განუცხადა, სადაც სააკაშვილისთვის სასჯელის გადავადების, ან გათავისუფლების საკითხზე სასამართლო პროცესი მიმდინარეობს.

როგორც გიორგი სააკაშვილი აცხადებს, ახლა ყველა დღეს მნიშვნელობა აქვს. ის „ვივამედის“ ხელმძღვანელს მიმართავს, უფრო მკაფიოდ განაცხადოს, რომ მისი ძმის მდგომარეობა ძალიან რთულია.

„ყველა დღეს მნიშვნელობა აქვს. დღევანდელი მონაცემებით, 68 კილოა. მმართველ ხელისუფლებას როგორ არ გრცხვენიათ, რა დონემდე მიიყვანეთ ადამიანი? თქვენთანაც შეიძლება მსგავსი მოხდეს. ამიტომ, მივმართავ ხელისუფლებას - არ ვიცი, ვინ იღებს გადაწყვეტილებას, მაგრამ ფაქტი ერთია - მიშა არის გადასარჩენი და ჩვენ ამას ვერასდროს შევეგუებით.

ასევე, კლინიკის ხელმძღვანელს მივმართავ - თქვენ ექიმი ხართ, ძალიან დიდი პატივს გცემთ. ამოიღეთ ხმა უფრო მკაფიოდ და განაცხადეთ, რომ მიშას მდგომარეობა ძალიან რთულია. ვისმენთ განცხადებებს, რომ საჭმელს არ იღებს და ამიტომაა 68 კგ. ეს არ არის მკურნალობა. აღიარეთ, რომ საქართველოში მიშას შესაბამის დონეზე მკურნალობა ვერ ხერხდება. ამას მოწმობს ისიც, რომ რეანიმაციაში არ გადაჰყავთ. რეანიმაციაში რომ გადაიყვანონ, მოსამართლემ იმ წუთასვე უნდა მიიღოს გადაწყვეტილება, რადგან მკაფიო გახდება, რომ მიშა სიცოცხლეს ცუდად ამთავრებს. ექიმებს მივმართავ, დადექით ჩვენს გვერდზე. მეტს ხომ არაფერს ვითხოვთ, მხოლოდ იმას, რომ ადამიანის სიცოცხლე გადავარჩინოთ. როდემდე უნდა გაგრძელდეს ეს შოუ, სასამართლო. მეორე თუ მესამე თვეა მიმდინარეობს, შეიძლება კიდევ სამი თვე გაგრძელდეს და ყველა სიკვდილის თანამონაწილე გავხდებით“, - განაცხადა გიორგი სააკაშვილმა.