მინდა მივულოცო ლევან ხაბეიშვილს. ძალიან მძიმე ბრძოლა იყო, ზოგ მომენტში ზღვარგადასული, მაგრამ მნიშვნელოვანია, რომ ჩვენ ყველანი ვართ ერთი გუნდის წევრი და ორი ყველაზე მნიშვნელოვანი ამოცანა გვაერთიანებს, - ამის შესახებ „ნაციონალური მოძრაობის“ ერთ-ერთმა ლიდერმა, გიორგი ბარამიძემ ჟურნალისტებთან საუბრისას განაცხადა.

კითხვაზე, აპირებს თუ არა ენმ-ს თავმჯდომარესთან, ლევან ხაბეიშვილთან თანამშრომლობას, ბარამიძე აღნიშნავს, რომ „ცხადია“.

„ძალიან მძიმე ბრძოლა იყო. ზოგ მომენტში მოხდა იმ საზღვრებზე გადაცდენა, რომელიც წესით უნდა იყოს დაწესებული (არ არის დაწერილი, მაგრამ დაუწერელზე ვლაპარაკობ) ერთი გუნდის შიგნით ურთიერთობაში, მაგრამ მნიშვნელოვანია ის, რომ ჩვენ ყველანი ვართ ერთი გუნდის წევრი და გვაერთიანებს ორი ყველაზე მნიშვნელოვანი ამოცანა ამ ეტაპზე. პირველი - მიხეილ სააკაშვილის სიცოცხლის გადარჩენა, მიშას, ნიკას და სხვა პოლიტპატიმრების გათავისუფლება პუტინისტური რეჟიმის ტყვეობიდან და მეორე - საქართველოს გათავისუფლება, საქართველოს მოღალატური გავრილოვების ბანდის მარწუხებისაგან,“ - განაცხადა გიორგი ბარამიძემ.

შეგახსენებთ, "ნაციონალური მოძრაობის" თავმჯდომარე ლევან ხაბეიშვილი გახდა. მან ხმების 52.58%-ს მოიპოვა. რაც შეეხება სხვა კანდიდატებს - ნიკა მელიამ ხმების 40% მიიღო, გიორგი მუმლაძემ 3.68%, ნონა მამულაშვილმა კი 3.73%. ენმ-ს თავმჯდომარის არჩევნებში მონაწილეობა 41 264 პირმა მიიღო.