„მშენებლობა განვადებით“ დამატებითი შესაძლებლობაა, რაც 2022 წელს მოგვეცა, რათა მნიშვნელოვანი პროექტების ინიცირება ვადაზე უფრო ადრე მომხდარიყო - პროგრამაში ჩვენი სამინისტრო წყალმომარაგების კომპანიის სახით იყო წარმოდგენილი და ხელმოწერილია ხელშეკრულებები, რომელიც კონკრეტულ ქალაქებში 24-საათიანი წყალმომარაგების უზრუნველყოფას ითვალისწინებს, - ამის შესახებ რეგიონული განვითარებისა და ინფრასტრუქტურის მინისტრმა ირაკლი ქარსელაძემ მთავრობის სხდომის დასრულების შემდეგ პრესკონფერენციაზე განაცხადა.
მისი თქმით, განვადებით მშენებლობის პროგრამაში მისი უწყების მიმართულება გეგმაზომიერად ვითარდება.
„პროგრამაში - „მშენებლობა განვადებით“ რეგიონული განვითარებისა და ინფრასტრუქტურის სამინისტრო წყალმომარაგების კომპანიის სახით იყო წარმოდგენილი. ხელმოწერილია ხელშეკრულებები, რომელიც კონკრეტულ ქალაქებში 24-საათიანი წყალმომარაგების უზრუნველყოფას ითვალისწინებს. კიდევ გრძელდება აღნიშნული პროექტი, რამდენიმე ტენდერი წელსაცაა გათვალისწინებული, რითაც მნიშვნელოვნად დავაახლოებთ გეგმას, რომელიც 2025 წლის ბოლომდე ყველა ქალაქში 24-საათიანი წყალმომარაგების გეგმას ემსახურება. აღნიშნული მიმართულება გეგმაზომიერად ვითარდება. ეს იყო ის დამატებითი შესაძლებლობა, რაც 2022 წელს მოგვეცა, რათა მნიშვნელოვანი პროექტების ინიცირება ვადაში უფრო ადრე მომხდარიყო, განვადება კი ტრანშებით ანგარიშსწორებას გულისხმობდა, რაც ბიუჯეტის ფარგლებში მოგცემდა შესაძლებლობას და მეორე მხრივ პროგრამაში კერძო კომპანიები იქნებოდნენ ჩართულები. თამამად შეიძლება ითქვას, რომ ეს ინიციატივა ძალიან მნიშვნელოვანი იყო“, - განაცხადა ირაკლი ქარსელაძემ.