პარტიამ დღევანდელი გადაწყვეტილებით უკან გადადგა ნაბიჯი. დღევანდელი გადაწყვეტილება ნიშნავს იმას, რომ ფულმა და არაფორმალურმა გავლენებმა გაიმარჯვა პოლიტიკასა და პოლიტიკურ იდეალებზე, - ამის შესახებ „ერთიანი ნაციონალური მოძრაობის“ წევრმა, ნუგზარ წიკლაურმა განაცხადა.

როგორც წიკლაურმა აღნიშნა, არ ეთანხმება ახალი მენეჯმენტის მმართველობის კურსს და მათ ყველა შესაძლო დემოკრატიული წესით ოპონირებას გაუწევს.

„მანამ, სანამ მიხეილ სააკაშვილი არის ციხეში, ერთადერთი სწორი გადაწყვეტილება იქნება ამ პარტიის წევრობა. ჩემთვის, ისევე როგორც ძალიან ბევრი ჩემი მეგობრისათვის, პოლიტიკური მიზნები დღევანდელ პოლიტიკურ ეტაპზე უცვლელი რჩება. ეს არის მიხეილ სააკაშვილის თავისუფლება და რუსული რეჟიმის დამარცხება საქართველოში.

არ ვეთანხმები ახალი მენეჯმენტის მმართველობის კურსს, არც იმ გამონათქვამებს, რაც წინასაარჩევნო პერიოდში გვესმოდა და გავუწევ ოპონირებას ყველა შესაძლო დემოკრატიული წესით. ასევე, არანაირი მონაწილეობა არ მექნება იმ პროცესში, რომელიც იქნება ჩამოყალიბებული არაფორმალური გავლენების შედეგად შექმნილი მმართველობის მიმართ,“ - განაცხადა ნუგზარ წიკლაურმა.

შეგახსენებთ, "ნაციონალური მოძრაობის" თავმჯდომარე ლევან ხაბეიშვილი გახდა. მან ხმების 52.58%-ს მოიპოვა. რაც შეეხება სხვა კანდიდატებს - ნიკა მელიამ ხმების 40% მიიღო, გიორგი მუმლაძემ 3.68%, ნონა მამულაშვილმა კი 3.73%. ენმ-ს თავმჯდომარის არჩევნებში მონაწილეობა 41 264 პირმა მიიღო.