სტიქიის შედეგად მიყენებული ზიანის აღმოფხვრის სამუშაოები ძალიან ინტენსიურად მიმდინარეობს, - ამის შესახებ რეგიონული განვითარებისა და ინფრასტრუქტურის მინისტრმა ირაკლი ქარსელაძემ მთავრობის სხდომის დასრულების შემდეგ პრესკონფერენციაზე განაცხადა.

მინისტრმა აღნიშნა, რომ დაზარალებულების მხარდაჭერა ძალიან მნიშვნელოვანია, ამ პროცესში მუნიციპალიტეტები ინტენსიურად არიან ჩართულები, დაწყებულია მასალების შესყიდვა და მთელი რიგი სამუშაოები.

„მთელ რიგ მუნიციპალიტეტებს უკვე დაწყებული აქვთ პროცესი ამ მიმართულებით. გამოიყო გარკვეული თანხა იმისთვის, რომ აღნიშნული პროცესი შეუფერხებლად ხორციელდებოდეს. მთლიანობაში, დაახლოებით, 20 მილიონი ლარის ზიანზე არის საუბარი, რომელიც ძალიან დიდია“, - განაცხადა მინისტრმა.

მისივე თქმით, სხვა დეტალები ცნობილი მას შემდეგ გახდება, რაც ყველა თანხა დაზუსტდება, თუმცა პროცესი დაწყებულია და ძალიან ინტენსიურად მიმდინარეობს.