ფოთის საზღვაო ნავსადგურში ტალანტების მოზიდვისა და განვითარების პროგრამა „ინპორტი“ დასრულდა.
„ეიპიემ ტერმინალს ფოთის“ მიერ გავრცელებული ინფორმაციით, პროგრამის ფარგლებში, ნავსადგურში, ხუთთვიანი თეორიული და პრაქტიკული კურსი ნავსადგურის საქმიანობის შესახებ, 6 ახალგაზრდამ გაიარა.
„ინპორტის“ მონაწილის, ლიზა შურღულაიას განცხადებით, აღნიშნულ პროგრამაში მონაწილეობის მიღება ძალიან საინტერესო და ამავდროულად შედეგიანი იყო.
„მსურდა დავბრუნებოდი საკუთარ ქალაქს, სადაც მოვახერხებდი დასაქმებას, როგორც საკუთარი ასევე ქალაქის წინსვლისათვის. „ეიპიემ ტერმინალსში“ მუშაობა საუკეთესო შესაძლებლობაა ცოდნის გამდიდრებისთვისა და პროფესიული ზრდისთვის. ყველაზე საინტერესო და დასამახსოვრებელი გუნდთა სიახლოვე და ერთად მიზნისკენ სწრაფვაა. დამამახსოვრდა ერთი საინტერესო შეკითხვა, თუ რატომ უნდა ავდგეთ ადრე ყოველ დღე, რომლის პასუხსაც იპოვი თუ გიყვარს შენი საქმე და ის დიდი გუნდი რომლის ნაწილიც ხარ შენ“, - განაცხადა ლიზა შურღაიამ.
ამასთან, „ინპორტის“ ერთ-ერთმა მონაწილემ ნიკა კვარაცხელიამ აღნიშნა, რომ პორტი ერთ-ერთი უმნიშვნელოვანესი ობიექტია ჩვენი ქვეყნისთვის.
„ფოთიდან ვარ და ყოველთვის მქონდა სურვილი, რომ ჩემს ქალაქში ვყოფილიყავი დასაქმებული, განსაკუთრებით იმ საქმიანობაში რისიც უნდა გვეამაყებოდეს. ვფიქრობ პორტი ერთ-ერთი უმნიშვნელოვანესი ობიექტია ჩვენი ქვეყნისთვის. კომპანიის ფასეულობები პროგრამის დაწყების შემდეგ უფრო მეტად გავიაზრე და გავიგე, მაგრამ მანამდეც ვფიქრობდი და ახლა უფრო მეტად ვარ დარწმუნებული თუ როგორი უნდა იყოს წარმატებული და თანამედროვე კომპანია“, - განაცხადა ნიკა კვარაცხელიამ.
„ეიპიემ ტერმინალს ფოთი“ ტალანტების მოზიდვისა და განვითარების პროგრამას „ინპორტი“ 2017 წლიდან ახორციელებს.