დედაქალაქის მერის, კახა კალაძის განცხადებით, თუ ოპოზიციის მორიგი გაერთიანება შეიქმნება, ეს პოლიტიკურ სივრცეში ცვლილებებს ვერ მოიტანს. აღნიშნულით ის “ლელოს“ თავმჯდომარის მამუკა ხაზარაძის განცხადებას გამოეხმაურა, სადაც ხაზარაძე წერს, რომ „ახალი ძალების გაერთიანების დროა, ვისაც ამ ქვეყნის განვითარება და გამარჯვება უნდა“.

„ეს მათი გადასაწყვეტია. ჩვენ მსგავსი რამდენი გაერთიანება გვინახავს? პირველად ხომ არ ვუყურებთ? ბოლოს ჩემს წინააღმდეგ იყო გაერთიანება თვითმმართველობის არჩევნების წინ. მთელი ოპოზიციური სპექტრი გაერთიანდა ჩემს წინააღმდეგ და თბილისის მოსახლეობის უმრავლესობამ გასცა მათ საკადრისი პასუხი. მთავარია, რომ ამ ქვეყანაში მცხოვრები თითოეული ადამიანი ხედავს რეალობას, ვის უყვარს ქვეყანა და სამშობლო. ადამიანები ხედავენ იმ რისკებს, რაც ომში ჩართულობასთან დაკავშირებით არსებობს. ჩემთვის ამას [ოპოზიციის ახალ გაერთიანებას] მნიშვნელობა არ აქვს, ცვლილების მოატანა არ შეუძლია. გვინახავს გაერთიანებულები და შემდეგ დაშლილნი. ეს ადამიანები ერთიანდებიან და ყოველთვის მარცხდებიან. დარწმუნებული, ვარ, მომავალშიც ასე იქნება", - აღნიშნა კალაძემ.