„ნაციონალურ მოძრაობაში“ ჩატარებული არჩევნების შედეგის შემდეგ პოლიტიკური ლანდშაფტის ცვლილება გარდაუვალია, - ამის შესახებ “რესპუბლიკური პარტიის” თავმჯდომარე ხათუნა სამნიძემ განაცხადა.
როგორც მან აღნიშნა, აუცილებელია ყველა პარტიამ გააანალიზოს ვითარება, ხოლო გაერთიანებაზე მოწოდებების დრო ჯერ არ არის.
„ამ არჩევნების შედეგის შემდეგ გარდაუვალია და აუცილებლად მოხდება პოლიტიკური ლანდშაფტის ცვლილება ქართულ პოლიტიკაში. ეს ნიშნავს იმას, რომ ყველა პარტიამ საკუთარ წიაღში უნდა გააანალიზოს ვითარება. ჯერ არც გაერთიანებების დროა და არც მოწოდებების, ვინ ვისთან უნდა გაერთიანდეს. ახლა ყველა პარტიამ უნდა გააანალიზოს ვითარება და ამის მიხედვით მიიღოს გადაწყვეტილება. „რესპუბლიკური პარტია“ ახლა ამ პროცესშია,“ - განაცხადა სამნიძემ.
შეგახსენებთ, „ნაციონალური მოძრაობის“ თავმჯდომარე ლევან ხაბეიშვილი გახდა. მან ხმების 52.58%-ს მოიპოვა. რაც შეეხება სხვა კანდიდატებს - ნიკა მელიამ ხმების 40% მიიღო, გიორგი მუმლაძემ 3.68%, ნონა მამულაშვილმა კი 3.73%. ენმ-ს თავმჯდომარის არჩევნებში მონაწილეობა 41 264 პირმა მიიღო.