ორი წლის განმავლობაში ორნიშნა ეკონომიკური ზრდა ფიქსირდება, რაც დასაქმების მაჩვენებელზეც აისახება, - ამის შესახებ ფინანსთა მინისტრმა, ლაშა ხუციშვილმა განაცხადა.

მისივე თქმით, დეკემბრის თვის ეკონომიკური ზრდის წინასწარი შეფასების მიხედვით, დეკემბრის თვეში ეკონომიკა რეალურ გამოსახულებაში 11%-ით გაიზარდა, ხოლო საშუალო, 12 თვის ეკონომიკური ზრდის მაჩვენებელი არის 10,1%.

„აღსანიშნავია ის, რომ დღგ-ს გადამხდელ საწარმოთა ბრუნვები დეკემბრის თვეში 18%-ზე მეტით გაიზარდა, რამაც ბუნებრივია, ასახვა ჰპოვა საგადასახადო შემოსავლებზეც. მიმდინარე წელს, იანვარში, საგადასახადო შემოსავლების 30%-იანი ზრდა დაფიქსირდა. უკვე მეორე წლის განმავლობაში, საქართველოში ორნიშნა ეკონომიკური ზრდა ფიქსირდება. გასულ წელს, მნიშვნელოვანი კონტრიბუტორი იყო ექსპორტის მნიშვნელოვანია ზრდა, რომელიც გაიზარდა 30%-ზე მეტად და ასევე, ტურიზმის აღდგენა, რომელმაც 2019 წლის მაჩვენებელს გადააჭარბა, დაახლოებით, 7-8%-ით. ბუნებრივია, აღნიშნული მაჩვენებლები აისახება დასაქმების შედეგებზეც,“ - განაცხადა ლაშა ხუციშვილმა.