„პალიტრა ჰოლდინგი“ კომპანიაში დასაქმებულ პირებს ბავშვის შეძენისას ფულად ჯილდოს გადასცემს.
როგორც „ინტერპრესნიუსს“ „პალიტრა ჰოლდინგის“ HR დეპარტამენტში განუცხადეს, თანხის მოცულობა 1000 ლარი იქნება.
„პატარას პირველი პრემია“ აუცილებლად გაახარებს ჩვენს თანამშრომლებს. „პალიტრა ჰოლდინგი“ ცდილობს მხარი დაუჭიროს მშობლებს და წაახალისოს შობადობის ზრდა. მენეჯმენტის გადაწყვეტილებით ჩვენ ვუნაზღაურებდით მშობლებს დეკრეტული შვებულების ნაწილს. ახლა კი მშობლები 1000 ლარსაც მიიღებენ ფულადი ჯილდოს სახით“, - განაცხადეს კომპანიის HR დეპარტამენტში.
მათივე განმარტებით, კომპანიის სოციალური პასუხისმგებლობის ფარგლებში, პრემია გაიცემა როგორც კომპანიაში დასაქმებულ ქალ, ისე მამაკაც თანამშრომლებზე, ხოლო იმ შემთხვევაში, თუ ბავშვის ორივე მშობელი „პალიტრა ჰოლდინგშია“ დასაქმებული, ფულად ჯილდოს თითოეული მათგანი მიიღებს.
კომპანიის მენეჯმენტის გადაწყვეტილება მიმდინარე წლის 1-ელი იანვრიდან მოქმედებს.
ცნობისთვის, მთავრობის გადაწყვეტილებით, 1-ელი იანვრიდან, დეკრეტული შვებულების პერიოდში სახელმწიფო დახმარება, კერძო სექტორში დასაქმებულებისთვისაც 1000 ლარიდან 2000 ლარამდე გაიზრდება.