საერთაშორისო ოლიმპიური კომიტეტის (IOC) განცხადებით, ისინი უარყოფენ უკრაინის პრეზიდენტის მრჩევლის, მიხაილო პოდოლიაკის ცილისმწამებლურ განცხადებებს, რომელმაც კომიტეტი ომის, მკვლელობისა და ნგრევის ხელშეწყობაში დაადანაშაულა.

„საერთაშორისო ოლიმპიური კომიტეტი უაღრესად კატეგორიულად უარყოფს ამ და სხვა ცილისმწამებლურ განცხადებებს. ის არ შეიძლება გახდეს რაიმე კონსტრუქციული დისკუსიის საფუძველი“, - აღნიშნულია კომიტეტის განცხადებაში.

შეგახსენებთ, საერთაშორისო ოლიმპიურმა კომიტეტმა განაცხადა, რომ უნდა განიხილონ რუსი და ბელარუსი სპორტსმენების 2024 წლის ოლიმპიადაში ნეიტრალური სტატუსით მონაწილეობის საკითხი.

კომიტეტის განცხადებით, არცერთ სპორტსმენს არ უნდა შეუშალოს ხელი ასპარეზობაში მხოლოდ მათი პასპორტის გამო.

განცხადებას უკრაინის პრეზიდენტი, ვოლოდიმირ ზელენსკი და პრეზიდენტის ოფისის ხელმძღვანელის მრჩეველი, მიხაილო პოდოლიაკი გამოეხმაურნენ.

ზელენსკის თქმით, რუსეთის 2024 წლის ოლიმპიადაზე ასპარეზობის დაშვება იმის ჩვენებას ნიშნავს, რომ „ტერორი რაღაცნაირად მისაღებია“. მიხაილო პოდოლიაკმა კი აღნიშნა, რომ საერთაშორისო ოლიმპიური კომიტეტი ომის, მკვლელობისა და ნგრევის ხელშემწყობია.