ამ ქვეყნის ინტერესების მტრობაა, როცა არავის მიზეზი არ აქვს ქვეყანას სანქციებისთვის გვერდის ავლა დააბრალოს და ეს ხალხი (ოპოზიცია) ამ ამბებს თხზავს, - ამის თაობაზე ჟურნალისტებთან ფრაქცია „ქართული ოცნების“ დეპუტატმა მიხეილ სარჯველაძემ განაცხადა.

სარჯველაძის თქმით, „ავსტრიის კანცლერის განცხადება სილის გაწნა იყო მათთვის, ვინც ტყუილ ამბებს იგონებს, რათა ხელისუფლების გასალანძღად სახელმწიფო გაილანძღოს“.

„ქართული ოცნების“ დეპუტატი იმასაც ამბობს, რომ მთელი მსოფლიო ძალიან მაღალი დონის ავტორიტეტული წყაროებიდან იღებს ინფორმაციას იმის შესახებ, რომ საქართველო საერთაშორისო ვალდებულებებს პირნათლად ასრულებს და არავითარ დარღვევას ადგილი არა აქვს.

„საფინანსო სექტორი სახელმწიფო დეპარტამენტმა შეაფასა. გუშინ ავსტრიის კანცლერმა გააკეთა განცხადება. სამწუხაროდ, ჩვენი ოპონენტები საკუთარ ხსნასა და პროგრესს ამ ქვეყნის წარუმატებლობაში ხედავენ, როცა ამ ქვეყანას ექმნება პრობლემები, მათ შორის რეპუტაციული თვალსაზრისით. ამიტომ ისინი არარსებულ დარღვევებს თხზავენ და იგონებენ მხოლოდ იმიტომ, რომ სახელმწიფოს რეპუტაციული ზიანი მიაყენონ. ეს კეთილსინდისიერი არ არის“, - განაცხადა მიხეილ სარჯველაძემ.

როგორც ავსტრიის კანცლერმა კარლ ნეჰამერმა საქართველოს პრემიერ-მინისტრ ირაკლი ღარიბაშვილთან ერთად გამართულ ბრიფინგზე განაცხადა, საქართველო სწორი მიმართულებით მიდის. მან ევროინტეგრაციის გზაზე საქართველოს დახმარების მზადყოფნა გამოხატა. კარლ ნეჰამერის განცხადებით, მოხარულია, რომ საქართველომ მხარი დაუჭირა ევროკავშირის ყველა ფინანსურ სანქციას.