პოლონეთი უკრაინისადმი F-16 თვითმფრინავების გადაცემას ნატოს ფარგლებში პარტნიორებთან განიხილავს.
ამის შესახებ პოლონეთის საგარეო საქმეთა მინისტრმა ზბიგნევ რაუმ ბალტიის ქვეყნების საგარეო საქმეთა მინისტრებთან ერთად გამართულ პრეს-კონფერენციაზე განაცხადა.
მინისტრმა აღნიშნა, რომ ყველაფერი, რასაც პოლონეთი უკრაინას აწვდის, ხორციელდება “ნატოს ფარგლებში პარტნიორებთან მჭიდრო კოორდინაციისა და თანხმობის ფარგლებში”.
“როგორც იცით, თვითმფრინავების საკითხი ჩვენ პარტნიორებთან განიხილება”, - დასძინა რაუმ.
მან აღნიშნა, რომ პოლონეთის მთავრობის პოლიტიკა არ ითვალისწინებს ისეთ მგრძნობიარე საკითხებზე დეტალების გაჟღერებას, როგორებიცაა უკრაინისადმი გადაცემული შეიარაღების, ტექნიკისა და საბრძოლო მასალის სახეობები და რაოდენობა.
ამავდროულად, რაუს თქმით, პოლონეთი მოხარულია გაეროს ქარტიასთან შესაბამისობაში უკრაინელებს სუვერენიტეტისა და ტერიტორიული მთლიანობის დაცვაში დაეხმაროს.