„ევროპელი დემოკრატების“  ლიდერები,  პაატა დავითაია და ნიკოლოზ ვაშაკიძე  საქართველოში  ნატოს სამეკავშირეო ოფისის ხელმძღვანელს შეხვდნენ

„ევროპელი დემოკრატების“ თავმჯდომარე პაატა დავითაია და „ევროპელი დემოკრატების“ პოლიტიკური საბჭოს თავმჯდომარე ნიკოლოზ ვაშაკიძე საქართველოში ნატოს სამეკავშირეო ოფისის ხელმძღვანელს ალექსანდრე ვინიკოვს შეხვდნენ.

ამის შესახებ ინფორმაციას „ევროპელი დემოკრატების“ პრესსამსახური ავრცელებს.

ინფორმაციის თანახმად, შეხვედრის თემა საქართველოს ჩრდილოატლანტიკურ ალიანსთან პოლიტიკური დიალოგის გაღრმავების პერსპექტივა და გამოწვევები იყო. ასევე, პრესსამასახურის ცნობით, შეხვედრაზე განიხილეს „ევროპელი დემოკრატების“ ლიდერების დაგეგმილი ვიზიტები ბრიუსელში, ნატოს წარმომადგენლებთან, ევროპარლამენტსა და ევროპის საბჭოში.

„საქართველოში ნატოს წარმომადგენლობის შეფთან ბატონ ვინიკოვთან შეხვედრამ საინტერესო და საქმიან გარემოში ჩაიარა. შეხვედრა საათზე მეტხანს გაგრძელდა. ჩვენ დეტალურად განვიხილეთ, ქვეყანაში გასატარებელი მნიშვნელოვანი რეფორმები, რაც ხელს შეუწყობს საქართველოს ჩრდილოატლანტიკურ ალიანსთან დაახლოებას.

შეხვედრაზე ვისაუბრეთ იმ სიტუაციაზე, რაც არის შექმნილი საქართველოს ოკუპირებულ ტერიტორიებთან დაკავშირებით. ბატონ ვინიკოვს, ოკუპაციასთან დაკავშირებით, ერთიანი სახელმწიფო სტრატეგიის შემუშავებაზე ჩვენი ხედვა გავაცანით. ეს ძალიან მნიშვნელოვანია ჩვენი სახელმწიფოსთვის. საუბარი შეეხო ევროკავშირის 12 პუნქტიანი რეკომენდაციების შესრულებას, რადგან ნატოში გაწევრიანება არ არის მხოლოდ სამხედრო მიმართულება, ეს არის ღირებულებები, რომელიც აგებულია დემოკრატიულ სისტემებზე, რაც ჩვენი ქვეყნისთვის გამოწვევაა.

დაგეგმილია და მალე გაიმართება „ევროპელი დემოკრატების“ ლიდერების შეხვედრები ბრიუსელში, ნატოს წარმომადგენლებთან, ნატოს საპარლამენტო ასამბლეასთან, ასევე ევროპის საბჭოში და ევროპარლამენტში.

მოხარული ვარ იმ შეთანხმებით, რაც შედგა ჩვენ შორის. გვექნება რეგულარული და აქტიური თანამშრომლობა ყველა იმ საკითხზე, რაც ხელს შეუწყობს საქართველოს ევროკავშირსა და ნატოში გაწევრიანებას“, - განაცხადა პაატა დავითაიამ.

რობინ ვაგენერი - „უცხოური გავლენის გამჭვირვალობის შესახებ“ კანონთან ერთად ევროკავშირში გაწევრიანება აღარ იქნება - ამის შანსი არ არის
ქართული პრესის მიმოხილვა 11.07.2024
ვახტანგ ძაბირაძე - თუ  ყველაფერი ასე გაგრძელდა, თან ამას დაემატა დასავლეთის მიერ არჩევნების შედეგების არ აღიარება, დასავლეთის საქართველოსთან პარტნიორობა დასრულდება და დასრულდება ყველა მიმართულებით
ფლორენს ბაუერი - დემოგრაფიულ ცვლილებასთან გამკლავების საუკეთესო გზა არის ისეთი პირობების შექმნა, რომელიც ადამიანებს საკუთარი მომავლისა და ოჯახის მიმართ მტკიცე რწმენას გაუჩენს
უპრეცედენტო პირობები Renault Captur-ის ახალი ავტომობილის შეძენისას
თიბისი სტარტაპერებისთვის ახალ კამპანიას იწყებს
ბაზისბანკი სვანეთის IV საერთაშორისო კინოფესტივალის ოფიციალური სპონსორია