დედაქალაქის მერია, სტუდენტთა დაფინანსების პროგრამის ფარგლებში, 2022-23 სასწავლო წლების გაზაფხულის სემესტრის სწავლის საფასურის დაფინანსების მიზნით დღეიდან განცხადებების მიღებას იწყებს.

ამის შესახებ თბილისის მერმა კახა კალაძემ მუნიციპალიტეტის მთავრობის სხდომაზე განაცხადა.

მისივე თქმით, დაფინანსება რამდენიმე კატეგორიას ეხება: სოციალურად დაუცველი სტატუსის მქონდე სტუდენტებს, ასევე მრავალშვილიანი ოჯახის წევრ სტუდენტებს და შშმ სტატუსის მქონე სტუდენტებს. ამ კატეგორიებს სწავლა სამივე აკადემიურ საფეხურზე უფინანსდებათ. კალაძის თქმით, გარდა ამისა, სახელმწიფო უნივერსიტეტების წარჩინებული მაგისტრანტებისთვის გაიცემა ფინანსური წახალისება - თბილისის მერიის სტიპენდია.

„დაფინანსდება თბილისის მუნიციპალიტეტის ტერიტორიაზე რეგისტრირებული ყველა სტუდენტი, რომელიც ზემოთ ხსენებულ ყველა კატეგორიას განეკუთვნება. რაც შეეხება დაფინანსების ოდენობას, რა თქმა უნდა, ეს დამოკიდებულია სტუდენტის მიერ წინა სემესტრში მიღებული შეფასებების საშუალო არითმეტიკულ ქულაზე. ამის გათვალისწინებით სტუდენტებს შეუძლიათ მიიღონ 50%, 70%, 100%-იანი დაფინანსება სემესტრული თანხის ფარგლებში, რომელიც არაუმეტეს 1 125 ლარია. დაინტერესებულმა სტუდენტმა უნდა მიმართოს მერიას. რაც შეეხება წარსადგენ დოკუმენტაციას, ამასთან დაკავშირებით დეტალურ ინფორმაციას მიიღებთ თბილისის მერიის ოფიციალურ ვებ-გვერდზე. 2022 წელს პროგრამის ბიუჯეტი გაიზარდა და ახალი მნიშვნელოვანი მიმართულება დავამატეთ“, - განაცხადა კალაძემ.

ამასთან, როგორც კალაძემ აღნიშნა, გასულ წელს ფინანსური მხარდაჭერა 4 555 სტუდენტს გაეწია, მათ შორის 3 020 სტუდენტს დაუფინანსდა სწავლა, 835 წარჩინებულ მაგისტრანტზე გაიცა თბილისის მერიის სტიპენდია.