მიხეილ სააკაშვილის უკანონო პატიმრობა და მისი სიცოცხლე ნომერ პირველი ამოცანაა ჩვენთვის. ეს საკითხი არის პრიორიტეტი და აქედან გამომდინარე მივიღებთ ყველა გადაწყვეტილებას, - ამის შესახებ „ნაციონალური მოძრაობის“ წევრმა, დავით კირკიტაძემ ჟურნალისტებს განუცხადა.

მისი თქმით, სამწუხაროა, რომ „ერთიანი ნაციონალური მოძრაობის" თავმჯდომარედ ლევან ხაბეიშვილის არჩევის შემდეგ, ხატია დეკანოიძემ საპარლამენტო ფრაქციის თავმჯდომარის თანამდებობის დატოვება გადაწყვიტა.

„ძალიან ვწუხვარ, რომ ხატია დეკანოიძემ ეს გადაწყვეტილება მიიღო. ალბათ, ეს იმით იყო გამოწვეული, რომ ფრაქციის რამდენიმე წევრმა, ჯერ კობა ნაყოფიამ, მერე ლევან ხაბეიშვილმა მასთან შეუთანხმებლად გააკეთეს ის განცხადებები, რაც საპარლამენტო და ფრაქციის მოღვაწეობას ეხებოდა. ხატია ფრაქციის ძალიან კარგი თავმჯდომარე იყო“, - განაცხადა კირკიტაძემ.

მან საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობაზეც ისაუბრა და აღნიშნა, რომ მას სამართლიანი სასამართლოს უფლება წართმეული აქვს.

„პაციენტის ნება-სურვილით არ ხდება რეანიმაციაში გადაყვანა ან რაიმე სამედიცინო ჩარევა, ამას წყვეტენ ექიმები და სამედიცინო პერსონალი. ჩვენ რასაც ვუყურებთ, ნათელია ის, რომ მიხეილ სააკაშვილის ჯანმრთელობის უფლება, მისთვის სამართლიანი სასამართლოს უფლება არის წართმეული. ამის გამო ვწუხვართ. სამწუხაროა, რომ ეს ადამიანი ამ ხელისუფლებამ სიკვდილის პირას მიიყვანა. მიხეილ სააკაშვილი, საღ-სალამათი ადამიანი შეიყვანეს საპატიმროში და დღეს ყველა ხედავს, რა მდგომარეობაშია. მიხეილ სააკაშვილმა შეიძლება უკანასკნელი ძალა მოიკრიბოს და საზოგადოების წინაშე წარდგეს, მაგრამ აქაც ექიმებმა უნდა გადაწყვიტონ მისი ჯანმრთელობის მდგომარეობიდან გამომდინარე, რამდენად აქვს საშუალება. როგორც ხედავთ, ექიმები არ იძლევიან რეკომენდაციას, რომ დარბაზში მოიყვანონ, რითაც კიდევ ერთხელ ადასტურებენ, რომ ის ძალიან მძიმედ არის“, - განაცხადა კირკიტაძემ.