„ლაგუნა ვერეს” მოწესრიგებასთან დაკავშირებით ნებისმიერი საწინააღმდეგო კამპანია განპიროვნებულია პოლიტიკური მიზეზებით, - ამის შესახებ თბილისის ვიცე-მერმა, ირაკლი ხმალაძემ განაცხადა, რითაც სამოქალაქო ორგანიზაციებისა და პროფესიული საზოგადოების წევრების მიერ „ლაგუნა ვერეს” მიმდებარედ მულტიფუნქციური პროექტის იდეასთან დაკავშირებით სოციალურ ქსელში გავრცელებულ პეტიციას გამოეხმაურა.

ამის მიუხედავად, მისივე თქმით, თუ პეტიციას მოამზადებენ და თბილისის მერიაში შეიტანენ, ისევე განიხილავენ, როგორც გეგმარების დავალებასთან დაკავშირებით შემოსულ წინადადებას იხილავენ.

„ჩემი აზრით, ამ ტერიტორიის მოწესრიგებასთან დაკავშირებით ნებისმიერი საწინააღმდეგო კამპანია განპიროვნებულია პოლიტიკური მიზეზებით. მიმაჩნია, რომ ამ ტერიტორიის მოწესრიგება ყველას ინტერესში შედის: „ლაგუნა ვერეს“ ინფრასტრუქტურის აღდგენა, ისტორიული ფაბრიკის შენობაში რესტავრაცია და მისი ფუნქციური დატვირთვა. ტერიტორიის მოწესრიგება, გასუფთავება, სატრანსპორტო კვანძის გამართვა და გალამაზება. არ ვიცი, რა პეტიციას ამზადებენ, თუმცა რამეს თუ მოამზადებენ და შემოიტანენ, ისევე განვიხილავთ, როგორც გეგმარების დავალებასთან დაკავშირებით შემოსულ წინადადებას ვიხილავთ. ჯერჯერობით ისევ ვართ განხილვის ეტაპზე. ახლა პროექტი გეგმარებითი დავალების მომზადების ეტაპზეა, გეგმარებითი დავალების შემდეგ უნდა მოხდეს განაშენიანების რეგულირების გეგმის დამტკიცება. მხოლოდ ამის შემდეგ გაიცემა მშენებლობის ნებართვა. იმის თქმა მინდა, რომ მთელ ამ პროცესში პროექტი დამტკიცებამდე ძალიან ბევრ სტადიას გაივლის. მშენებლობის ნებართვის გაცემამდე, ყველანაირად გაიფილტრება, დამუშავდება, დაიხვეწება არქიტექტორული თვალსაზრისითაც, ფუნქციურადაც, სხვადასხვა პირების მიერაც. ის ისტორიულ საბჭოზე და საკრებულოში გავა. შესაბამისად, მინიმუმამდე დაყვანილია და გამორიცხული, რომ პროექტში ხარვეზები დარჩეს, ამ პროექტმა შეინარჩუნოს ისეთი დეტალები, რომელიც საწინააღმდეგო იქნება ქალაქის ინტერესებისთვის. კიდევ ერთხელ ვამბობ, თუ ვინმე საწინააღმდეგო მოსაზრება აქვს, ჩვენ არაფერი საწინააღმდეგო არ გვაქვს, შემოიტანონ, განვიხილავთ და ამასაც პასუხს გავცემთ“, - განაცხადა ხმალაძემ.

ცნობისთვის, ბიძინა ივანიშვილის საქველმოქმედო ფონდის - „ქართუ ფონდის“ გადაწყვეტილებით, „ლაგუნა ვერეს“ სივრცე მუნიციპალიტეტს გადაეცა. თბილისის მერის განმარტებით, აბრეშუმის ქარხნის შენობის ტერიტორია ისე განვითარდება, რომ არსებული სივრცე არ დაინგრევა. მისივე თქმით, ამ ეტაპისთვის, პროექტის მხოლოდ გეგმარებითი დავალებაა წარმოდგენილი. ასევე, მოქალაქეების ნაწილი ითხოვს, რომ ყოფილი აბრეშუმის ფაბრიკისა და „ლაგუნა ვერეს“ მიმდებარედ ცათამბჯენები არ აშენდეს და ამ მიზნით პეტიციაც შექმნეს.