მგონია, თავისივე თანაპარტიელების ხელების დამტვრევაც მოუწევს, რადგან მიხეილ სააკაშვილი წელიწად ნახევარია ყოველ დღე კვდება და რაღაც ნაწილში ეს ტყუილი იყო, - ასე ეხმიანება "გირჩის" დეპუტატი სანდრო რაქვიაშვილი ჟურნალისტებთან "ნაციონალური მოძრაობის" თავმჯდომარის, ლევან ხაბეიშვილის განცხადებას, რომ ხელებს მოამტვრევს მას, ვინც მიხეილ სააკაშვილის დოკუმენტაციას აყალბებს.

მისი თქმით, მიხეილ სააკაშვილის ჯანმრთელობასთან დაკავშირებით ბევრი ადამიანი იტყუებოდა.

"არ ვიცი, თუ უნდა, დაამტვრიოს, მე ზოგადად ძალადობის წინააღმდეგი ვარ, ვერ გავამართლებ ამას, ვერც ავუკრძალავ რაღაც გაგებით, მაგრამ მე მგონია, თავისივე თანაპარტიელების ხელების დამტვრევაც მოუწევს, რადგან მიხეილ სააკაშვილი წელიწად ნახევარია ყოველ დღე კვდება და რაღაც ნაწილში ეს ტყუილი იყო ყველა ვარიანტში, ასე რომ, ტყუილის გამო დასჯაზე თუა საუბარი, მგონი, ბევრი ადამიანის დასჯა მოუწევს, ოპონენტებისა და თანაპარტიელების ჩათვლით. წელიწად ნახევარია ყოველ დღე გვეუბნებიან, რომ დღეს გადამწყვეტი მომენტია და სხვათა შორის, მგონი თავად მას ჰქონდა ღამის 12 საათზე ბრიფინგი, რომ დრო აღარ ითმენს, ხვალ თუ არაფერი მოხდება... ან მას მოატყუეს ან თვითონ მოიტყუა, დარწმუნებული ვარ, ბევრი ადამიანი იტყუებოდა," - განაცხადა რაქვიაშვილმა.