გრიგოლ ხურციძე - თუ საქართველოში სამედიცინო სისტემას რამის გაკეთება შეეძლო, მიხეილ სააკაშვილს ყველაფერი ჩაუტარდა, ჩვენი რესურსი ამოვწურეთ და პაციენტის მდგომარეობა მაინც უარესდება
საქართველოს ყოფილი სახალხო დამცველის სამედიცინო კონსილიუმის წევრის, გრიგოლ ხურციძის განცხადებით, იმ სამედიცინო რესურსებიდან გამომდინარე, რაც საქართველოში არსებობს, მიხეილ სააკაშვილს ყველანაირი პროცედურა ჩაუტარდა.
მისი თქმით, ქართველმა ექიმებმა თავიანთი რესურსი ამოწურეს, თუმცა პაციენტის მდგომარეობა მაინც უარესდება.
ასევე, როგორც გრიგოლ ხურციძემ თბილისის საქალაქო სასამართლოში აღნიშნა, პაციენტს ძალიან მძიმე წონის კლება აქვს, რომელიც იმ შემთხვევაში შეჩერდება, თუ ის ჭამას დაიწყებს, მაგრამ ამას ვერ ახერხებს.
„ექიმების მთავარი მოვალეობაა, უზრუნველვყოთ პაციენტის კეთილდღეობა. პროაქტიულობა ნიშნავს იმას, შენ როცა იცი, რომ პაციენტი რთულ მდგომარეობაშია, უნდა ჩაუტარო რაღაც ისეთი მკურნალობა, რის შედეგადაც ასეთ მდგომარეობამდე არ მივა. სექტემბრიდან მოყოლებული, პაციენტის მდგომარეობა უარესდებოდა და სამედიცინო პერსონალი ვერანაირად ვერ ეხმარებოდა მას მდგომარეობის გაუმჯობესებაში. პროგნოზირებულია, რომ თუ სიტუაცია ასე გაგრძელდება, მდგომარეობა შეიძლება კრიტიკულამდე მივიდეს. რამდენიმე დღის განმავლობაში 73 კილოგრამიდან 68 კილოგრამზე ჩამოვიდა. ძალიან მძიმე წონის კლებაა, რომელიც შეიძლება შეჩერდეს, თუ მიხეილ სააკაშვილი ჭამას დაიწყებს, მაგრამ თავად ვერ ჭამს. პროაქტიულობა ნიშნავს იმას, რომ უნდა ჩავატაროთ ისეთი ღონისძიებები, რაც წონის კლების პროცესს შეაჩერებს.
ჩვენი ექსპერტული მოსაზრებით, თუ სამედიცინოს სისტემას საქართველოში რამის გაკეთება შეეძლო, იმ რესურსიდან გამომდინარე, რაც საქართველოში მოგვეპოვება, მიხეილ სააკაშვილს მაქსიმალურად ყველაფერი ჩაუტარდა. ჩვენ ჩვენი რესურსი ამოვწურეთ. მეტს ვერაფერს ვშვრებით და პაციენტის მდგომარეობა მაინც უარესდება“, - განაცხადა გრიგოლ ხურციძემ.
