ჩვენ გვაბრალებენ, თითქოს სახელმწიფომ ვინმე აწამა და მიხეილ სააკაშვილის დაავადებები ამ წამების შედეგად ჩამოყალიბდა, რაც არანაირ მტკიცებულებას არ ეფუძნება, - ამის შესახებ იუსტიციის მინისტრმა, რატი ბრეგაძემ განაცხადა.

როგორც მან იუსტიციის სამინისტროში გამართულ ბრიფინგზე აღნიშნა, სასჯელის აღსრულების პროცედურა საქართველოს კანონმდებლობითაა გაწერილი და ის ადამიანთა უფლებების უმაღლეს საერთაშორისო სტანდარტებთან შესაბამისობაშია.

„ქართული სამართლის სისტემა ევროპულ სტანდარტებთან ძალიან ახლოსაა. ჩვენ არაერთი საერთაშორისო ხელშეკრულების მხარე ვართ. ევროპული ინტეგრაციის კუთხითაც, კერძოდ, სამართლის ჰარმონიზაციას ვგულისხმობ, მოწინავეები ვართ.

ერთი რამ აუცილებლად უნდა ვთქვათ - სასჯელის აღსრულების პროცედურა საქართველოს კანონმდებლობითაა გაწერილი და ის ადამიანთა უფლებების უმაღლეს საერთაშორისო სტანდარტებთან შესაბამისობაშია. ჩვენ მხოლოდ ქართული კანონმდებლობის ფარგლებში ვმოქმედებთ და მოწოდებებით ვერ ვიმოქმედებთ. თუ მოწოდებებსა და განცხადებებს მივყვებით, ჩვენ სამართლიანი სახელმწიფო ვერ ვიქნებით.

ჩვენ გვაბრალებენ, თითქოს სახელმწიფომ ვინმე აწამა და მიხეილ სააკაშვილის დაავადებები ამ წამების შედეგად ჩამოყალიბდა. ეს არანაირ მტკიცებულებას არ ეფუძნება. მით უმეტეს, ექსპერტმა, რომელიც ამბობს, რომ ვინმე აწამეს, უნდა იცოდეს, რომ საქართველოში ექსპერტიზა კანონმდებლობას ეფუძნება და ის მსგავს განცხადებებს არ ითვალისწინებს“, - განაცხადა რატი ბრეგაძემ.