საქართველოს ფინანსთა სამინისტროს საგამოძიებო სამსახურსა და სომხეთის რესპუბლიკის სახელმწიფო შემოსავლების კომიტეტს შორის მემორანდუმი გაფორმდა
საქართველოს ფინანსთა სამინისტროს საგამოძიებო სამსახურის უფროსი სოსო რამიშვილი, სხვა ხელმძღვანელ პირებთან ერთად, ოფიციალური ვიზიტით სომხეთის რესპუბლიკის სახელმწიფო შემოსავლების კომიტეტს ეწვია.
ფინანსთა სამინისტროს საგამოძიებო სამსახურის მიერ გავრცელებული ინფორმაციით, ვიზიტის ფარგლებში უწყებების პირველ პირებს შორის ორმხრივი შეხვედრები გაიმართა.
მათივე ცნობით, მხარეებმა ისეთი მნიშვნელოვანი საკითხები განიხილეს, როგორებიცაა საფინანსო-ეკონომიკურ სფეროში ჩადენილი დანაშაულების წინააღმდეგ ბრძოლა, კომპეტენციის ფარგლებში ფინანსური და სხვა სახის დანაშაულების პრევენცია და სხვა.
„გაფორმდა ურთიერთგაგების მემორანდუმი, რომლის ფარგლებშიც საქართველოსა და სომხეთის რესპუბლიკის კოლეგა უწყებებს შორის, საფინანსო-ეკონომიკურ სფეროში ჩადენილი დანაშაულის გამოვლენის, აღკვეთისა და გამოძიების კუთხით ორმხრივი თანამშრომლობა კიდევ უფრო გაღრმავდება და გააქტიურდება.
ვიზიტის შედეგად გამოცდილების გაზიარებისა და მისი პრაქტიკაში დანერგვის უზრუნველყოფის მიმართულებით კონკრეტული სამომავლო ღონისძიებები დაიგეგმა“, - აღნიშნულია გავრცელებულ ინფორმაციაში.
