მთავარი კითხვა არის, თუ რას ვშვრებით ჩვენ - ვეგუებით თუ არა ამ პრორუსული, რუსული უმცირესობის მხრიდან ჩვენი სახელმწიფო ინტერესების ღალატს და მიტაცებას? - რა თქმა უნდა, ქართულ საზოგადოებაში ეს პასუხი არის „არა“, - ამის შესახებ „დროას“ ლიდერმა, ელენე ხოშტარიამ ბრიფინგზე განაცხადა, სადაც აბაშიძე-კარასინის სატელეფონო საუბარი შეაფასა.

მისივე თქმით, ქართულმა საზოგადოებამ ეს „არა“ 24 თებერვალს რუსეთს, უკრაინას და მთელ მსოფლიოს უნდა უთხრას.

„ჩვენ მოვისმინეთ კარასინი-აბაშიძის ძალიან თბილი მეგობრული საუბარი ქართული საზოგადოების ზურგს უკან. აქ არის საუბარი არა საქართველოს ინტერესებზე, არა ჩვენს ოკუპაციაზე, არა ჩვენს უსაფრთხოებაზე, არა ჩვენი ინტერესების დაცვაზე, არა უკრაინაში დახოცილ ბავშვებზე, არა იმ ბოროტებაზე, რასაც ჩადის რუსეთი, არამედ ლაპარაკია რუსეთის მხრიდან საქართველოს მთავრობის კმაყოფილებაზე რაღაცა საკუთარი კონკრეტული ინტერესების შესახებ. ასე ხდება, როდესაც არაფორმალური ოლიგარქი ჩვენს ზურგს უკან რუსულ პოლიტიკას ატარებს.

მთავარი კითხვა არის, თუ რას ვშვრებით ჩვენ - ვეგუებით თუ არა ამ პრორუსული, რუსული უმცირესობის მხრიდან ჩვენი სახელმწიფო ინტერესების ღალატს და მიტაცებას? - რა თქმა უნდა, ქართულ საზოგადოებაში ეს პასუხი არის „არა“ და 24 თებერვალი, განმსაზღვრელი საერთოდ დასავლეთ ცივილიზებული სამყაროსი არის ის დღე, როდესაც ეს „არა“ ჩვენ ყველამ ერთად, ქართულმა საზოგადოებამ, უნდა უთხრას რუსეთს“, - განაცხადა ელენე ხოშტარიამ.

შეგახსენებთ, აბაშიძე-კარასინის საუბარი Youtube-ზე, Cyber Kmara-ს არხზე გავრცელდა. გამოქვეყნებულ ჩანაწერის თანახმად, აბაშიძე და კარასინი ახალი მაგისტრალის მშენებლობის შესახებ საუბრობენ. ჩანაწერის თანახმად, ზურაბ აბაშიძე მას განუმარტავს, რომ ზემო ლარსის მიმართულებით პარალელური მაგისტრალის მშენებლობა მიმდინარეობს.

საქართველოს პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე რუსეთის ფედერაციის საბჭოს საერთაშორისო კომიტეტის თავმჯდომარე გრიგორი კარასინთან სატელეფონო საუბრის ჩანაწერის ავთენტურობას ადასტურებს და აცხადებს, რომ ჩანაწერი ორჯერ მოისმინა და სასკანდალო რა არის, ჯერ ვერ მიხვდა. მისივე თქმით, როცა ფორსმაჟორული სიტუაცია იქმნება საზღვარზე სატრანსპორტო თვალსაზრისით, მაშინ ერთმანეთს ყოველთვის უკავშირდებიან და ეს ჩვეულებრივი მოვლენაა.