"გირჩი-მეტი თავისუფლების" ლიდერის, ზურა ჯაფარიძის შეფასებით, 24 თებერვალს დაანონსებულ შეკრებაზე ქართულმა საზოგადოებამ უნდა აჩვენოს, რომ უკრაინის გვერდით დგას.

როგორც მან დღევანდელ ბრიფინგზე აღნიშნა, აბაშიძე-კარასინის საუბარი არის ამაზრზენი.

"24 თებერვალს პირველ რიგში, უნდა დავანახოთ უკრაინელებს, რომ ჩვენ არ ვართ ის ხალხი, ვინც ამ ფონზე, როცა უკრაინაში რუსეთი ხოცავს ბავშვებს, რუსეთს ასეთ ტონალობაში მეგობრულად და ჯიგრულად ველაპარაკებით. ეს არის ამაზრზენი, ეს არის გასაკეთებელი 24 თებერვალს. პირველ რიგში, უნდა დავანახოთ უკრაინელებს და შემდეგ დანარჩენ მსოფლიოს, მათ შორის საკუთარ თავსაც დავუმტკიცოთ, რომ ეს არ არის ბუნებრივი და ნორმალური მდგომარეობა იმ ხალხისთვის, ვინც ამ ქვეყანაში ცხოვრობს, ასე არ გვზრდიდნენ ჩვენ. ამიტომ, ყველა შევიკრიბოთ 24 თებერვალს, რუსთაველზე, პარლამენტის წინ", - განაცხადა ჯაფარიძემ.

მისი შეფასებით, ზურაბ აბაშიძის განცხადება, რომ ჩანაწერში არაფერი "სასკანდალო არ არის", რუსული მესიჯბოქსის ნაწილია. როგორც ჯაფარიძემ აღნიშნა, რუსეთთან ასეთ ტონალობაში საუბარი მიუღებელია.

"ხალხს აჯერებენ, რომ რუსეთთან ასეთი ლაპარაკი "მოსულა", ეს ჩვეულებრივი ამბავია და რა პრობლემაა", - განაცხადა ჯაფარიძემ.

შეგახსენებთ, აბაშიძე-კარასინის საუბარი Youtube-ზე, Cyber Kmara-ს არხზე გავრცელდა. გამოქვეყნებულ ჩანაწერის თანახმად, აბაშიძე და კარასინი ახალი მაგისტრალის მშენებლობის შესახებ საუბრობენ. ჩანაწერის თანახმად, ზურაბ აბაშიძე მას განუმარტავს, რომ ზემო ლარსის მიმართულებით პარალელური მაგისტრალის მშენებლობა მიმდინარეობს.

საქართველოს პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე რუსეთის ფედერაციის საბჭოს საერთაშორისო კომიტეტის თავმჯდომარე გრიგორი კარასინთან სატელეფონო საუბრის ჩანაწერის ავთენტურობას ადასტურებს და აცხადებს, რომ ჩანაწერი ორჯერ მოისმინა და სასკანდალო რა არის, ჯერ ვერ მიხვდა. მისივე თქმით, როცა ფორსმაჟორული სიტუაცია იქმნება საზღვარზე სატრანსპორტო თვალსაზრისით, მაშინ ერთმანეთს ყოველთვის უკავშირდებიან და ეს ჩვეულებრივი მოვლენაა.