„სტრატეგია აღმაშენებლის“ ლიდერის, გიორგი ვაშაძის განცხადებით, საქართველოს მესამე პრეზიდენტის საკითხთან დაკავშირებით საერთაშორისო ასპარეზზე ქმედითი ნაბიჯები გადაიდგმება, რომელიც „ქართულ ოცნებას“ პოზიციის შეცვლას აიძულებს.

როგორც მან ჟურნალისტებს განუცხადა, ამაში, მისი ინფორმაციით, პირადად უკრაინის პრეზიდენტი ვოლოდიმირ ზელენსკია ჩართული.

„მიხეილ სააკაშვილი არის უმძიმეს მდგომარეობაში. მგონი, ყველა სპეკულაცია ამ საკითხზე უნდა დასრულდეს. დანაშაულებრივი იყო გუშინ იუსტიციის მინისტრის განცხადება თავისივე შემოგდებულ საკითხებზე, რეანიმაციის თემებით სპეკულირება. მე პირდაპირ გეუბნებით, რომ, უახლოეს მომავალში, საერთაშორისო ასპარეზზე ველოდები ძალიან კონკრეტულ ქმედით ნაბიჯებს როგორც ევროპის მხრიდან, ასევე აშშ-ის მხრიდან. როგორც ვიცი, ამაში პირდაპირ ჩართულია პერსონალურად პრეზიდენტი ზელენსკი და კონკრეტული ქმედითი ნაბიჯები იქნება, რომელიც ვფიქრობ, რომ აიძულებს „ქართულ ოცნებას“ კონკრეტული ნაბიჯები გადადგას. რაც შეგვეხება ჩვენ, ჩვენ უნდა ვიყოთ ძალიან ფხიზლად და მაქსიმალურად აქტიურები იმისთვის, რომ დავიხსნათ მისი სიცოცხლე.

„ქართულ ოცნებას“ გადაწყვეტილი აქვს რაც შეიძლება მალე გამოასალმოს სიცოცხლეს მიხეილ სააკაშვილი. მინდა „ქართული ოცნების“ ყველა წარმომადგენელს და იმ ადამიანებს, ვინც ამ დანაშაულებს ასრულებენ პოლიტიკური ლიდერების დავალებით, მოვუწოდო, რომ ეიფორიაში ნუ ჩავარდებით, ნუ გგონიათ, რომ მიხეილ სააკაშვილის წამება და არაადამიანურ მდგომარეობაში ყოფნა ვინმეს შერჩება. მომიტანოს სასამართლო სისტემამ რომელიმე შემთხვევა, როცა ამაზე უფრო მძიმე მდგომარეობა იყო, როცა სასჯელის გადავადება მოხდა. როგორც ვიკვლევდი, ამაზე მძიმე შემთხვევები ვერ აღმოვაჩინე. უბრალოდ პროცესი იწელება და უნდათ, რომ რაც შეიძლება მეტი ზიანი მიაყენონ მიხეილ სააკაშვილის ჯანმრთელობას“, - განაცხადა ვაშაძემ.