ცენტრალური საარჩევნო კომისიის თავმჯდომარის გიორგი კალანდარიშვილის განცხადებით, მნიშვნელოვანია საზოგადოების მაქსიმალური ინფორმირება იმ დემოკრატიული პროცესების თაობაზე, რომლის შედეგიც არჩევნებია. როგორც მან არჩევნების საერთაშორისო დღესთან დაკავშირებით გამართულ ღონისძიებაზე ჟურნალისტებს განუცხადა, ამ პროცესში ახალგაზრდებს განსაკუთრებული როლი აქვთ.

„დღეს არის არჩევნების საერთაშორისო დღე, რომელსაც ევროპის მასშტაბით საარჩევნო ადმინისტრაციები, არჩევნების საკითხით დაკავებული ექსპერტები და შესაბამისი უწყებები აღნიშნავენ. ის რამდენიმე მიზანს ემსახურება, ეს არის არჩევნების მნიშვნელობის შესახებ საზოგადოების მაქსიმალური ინფორმირება იმ დემოკრატიული პროცესების თაობაზე, რომლის შედეგი გახლავთ არჩევნები და, რა თქმა უნდა, ყველა იმ სიახლისა და მნიშვნელოვანი მოვლენის შესახებ საზოგადოების ცნობიერების ამაღლება, რომელიც არჩევნებს უკავშირდება.

საქართველოში არჩევნების განვითარებას მთელი რიგი საფეხურები ჰქონდა. დღეს ჩვენ მივედით იქამდე, რომ 2024 წელს და შემდგომ, ყოველი მომდევნო არჩევნებისას ქვეყანაში გამოყენებული იქნება ტექნოლოგიები. ადმინისტრაციისთვის ძალიან მნიშვნელოვანია ის, რომ ამ დღეს ჩვენ ახალგაზრდებთან ერთად აღვნიშნოთ არჩევნების საერთაშორისო დღე, მივაწოდოთ მათ ინფორმაცია ტექნოლოგიური სიახლეების შესახებ, რომელიც უკანასკნელი საარჩევნო რეფორმის მნიშვნელოვანი ნაწილი გახლავთ. ახალგაზრდები გახლავთ მნიშვნელოვანი რესურსი სახელმწიფოსთვის. მნიშვნელოვანია არჩევნებში მათი ჩართულობა სხვადასხვა პოზიციებისა და რანგების გათვალისწინებით იმისთვის, რომ ჩვენ ერთობლივი ძალისხმევით ქვეყანაში შევძლოთ მაღალი სტანდარტების შესაბამისი არჩევნების ჩატარება. ასევე, უზრუნველვყოთ ახალგაზრდების მაქსიმალური ჩართულობა, როგორც საარჩევნო პროცესებში, ასევე სხვადასხვა მნიშვნელოვან სახელმწიფოებრივ პროცესებში", - განაცხადა კალანდარიშვილმა.