დაავადებათა კონტროლისა და საზოგადოებრივი ჯანმრთელობის ეროვნულმა ცენტრმა განვლილი ერთი წლის საქმიანობა შეაჯამა.

ჯანდაცვის სამინისტროს ინფორმაციით, ღონისძიება ჯანდაცვის მინისტრის პირველმა მოადგილემ, თამარ გაბუნიამ გახსნა.

ჯანდაცვის მინისტრის პირველმა მოადგილემ, დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის მოვალეობის შემსრულებელმა ყურადღება ცენტრის სამეცნიერო საქმიანობასა და სამომავლო გეგმებზე გაამახვილა. თამარ გაბუნიას განცხადებით, მოსახლეობის ჯანმრთელობის შენარჩუნებისა და გაუმჯობესების საქმეში, დაავადებათა კონტროლის ცენტრის ხელმძღვანელობით, ქვეყანაში არაერთი წარმატებული ინიციატივა განხორციელდა.

„ცენტრის 2022 წლის ანგარიში და 2023 წლის საქმიანობის ძირითადი მიმართულებები, მოწვეულ სტუმრებს დაავადებათა კონტროლის ეროვნული ცენტრის გადამდებ დაავადებათა დეპარტამენტის უფროსმა ხათუნა ზახაშვილმა წარუდგინა. ანგარიშში ყურადღება გამახვილდა გეგმურ იმუნიზაციაზე, დედათა და ბავშვთა ჯანმრთელობაზე, ვირუსული ჰეპატიტების ელიმინაციის კოლაბორაციული ცენტრის მნიშვნელობაზე, თამბაქოს კონტროლის გაძლიერებასა და სხვა პრიორიტეტულ საკითხებზე. შემუშავდა ტუბერკულოზის კონტროლის 2023-2025 წლების სტრატეგია და ამ მიმართულებით, გაფართოვდა სკრინინგი. დაინერგა ტუბერკულოზის დიაგნოსტიკის ახალი ალგორითმები. გაუმჯობესდა აივ-ტესტირებით მოცვა და ინფექციის ახალი შემთხვევების გამოვლენა. აღინიშნა, რომ 2022 წელს, რეგიონულ დონეზე კვლევების გაფართოების გზით, მოხდა გრიპზე და რესპირატორულ ინფექციებზე ეპიდზედამხედველობის შესაძლებლობების გაძლიერება. რეგულირების სააგენტოსთან თანამშრომლობით, საქართველოს მასშტაბით, ინფექციის კონტროლის კუთხით 92 სამედიცინო დაწესებულების მონიტორინგი განხორციელდა, სადაც სამედიცინო ინსტრუმენტების ლაბორატორიული კვლევის სტერილობა შემოწმდა. ანგარიშში საუბარი შეეხო სისხლის უანგარო დონაციის ხელშეწყობის მიზნით განხორციელებულ და დაგეგმილ აქტივობებსაც. შეხვედრას ოკუპირებული ტერიტორიებიდან დევნილთა,შრომის,ჯანმრთელობისა და სოციალური დაცვის მინისტრი ზურაბ აზარაშვილი, მინისტრის მოადგილეები ილია ღუდუშაური და თამილა ბარკალაია, ჯანდაცვის სამინისტროს დაქვემდებარებული უწყებებისა და დეპარტამენტების ხელმძღვანელი პირები, ჯანმრთელობის დაცვისა და სოციალურ საკითხთა კომიტეტის წარმომადგენლები და სხვა საპატიო სტუმრები ესწრებოდნენ“, - აღნიშნულია ინფორმაციაში.