100 ადამიანიდან, თუ 70 არ გეუბნება, რას ფიქრობს, საკუთარ თავში უნდა დაინახო პრობლემა - დაუჯერებლად მეჩვენება, გასული წლის აგვისტოს შემდეგ მთავრობისთვის ნდობა უფრო მეტ ადამიანს გამოეცხადებინა, ვიდრე მანამდე უცხადებდა, - ამის შესახებ "გირჩის" დეპუტატმა იაგო ხვიჩიამ განაცხადა, რითაც NDI- ის კვლევებს გამოეხმაურა.

ხვიჩიას მიაჩნია, რომ ასეთი სახის კვლევები პოლიტიკურ რეალობას ვერ აჩვენებენ.

„როცა კვლევის შედეგად ამოვა ის, რომ გამოკითხულთა 25% ხმას აძლევს "ქართულ ოცნებას", 6% - „ნაცებს" და მეტი არაფერი ვიცით, ასეთ კვლევას არანაირი ღირებულება არ გააჩნია. როგორი ნიჰილიზმიც არ უნდა იყოს, კვლევას ატარებდე და 100 ადამიანიდან, თუ 70 არ გეუბნება რას ფიქრობს, ე.ი. საკუთარ თავში უნდა დაინახო პრობლემა. ინფორმაცია არ მაქვს, ამ კვლევის ჩატარების მეთოდოლოგიაზე რა და როგორ შეიცვალა, მაგრამ დაუჯერებლად მეჩვენება, რომ გასული წლის აგვისტოს შემდეგ მთავრობისთვის ნდობა გამოეცხადებინა უფრო მეტ ადამიანს, ვიდრე მანამდე აცხადებდა. ამის ლოგიკური ახსნა მხოლოდ ის შეიძლება იყოს, რომ ომის პირობებსა და "აბა, ომი გინდათ" კამპანიის გათვალისწინებით, შეიძლება, რამდენიმე პროცენტით მეტმა ადამიანმა ხელისუფლების ეს ვერსია დროებით დაიჯერა. თუმცა, საქართველოს მთავრობას ნდობა რომ არ დაუმსახურებია, ფაქტია," - განაცხადა ხვიჩიამ.

NDI-ის კვლევის მიხედვით, გამოკითხულთა უმეტესობა კვლავ პოლიტიკურად გადაუწყვეტელია. 39% ფიქრობს, რომ მის შეხედულებებთან ახლოს არცერთი პარტია არ დგას. 25% მიიჩნევს, რომ მის შეხედულებებთან ახლოს „ქართული ოცნება“ დგას, 6%-სთვის ეს პარტია „ნაციონალური მოძრაობაა“.

კითხვაზე, „რომელი პარტია დგას თქვენს შეხედულებებთან ყველაზე ახლოს?“ 56%-ია იმ მოქალაქეების ჯამი, რომელთათვისაც ეს არცერთი პარტია არაა, ან არ იციან და პასუხზე უარი განაცხადეს. აღნიშნული ანგარიში 3 დეკემბრიდან - 20 დეკემბრამდე ქვეყნის მასშტაბით ჩატარებულ, საქართველოს ზრდასრული მოსახლეობის წარმომადგენლობით პირისპირ გამოკითხვის შედეგებს ემყარება (ოკუპირებული ტერიტორიების გამოკლებით). დეკემბერში ჩატარებული გამოკითხვა სულ 2,519 დასრულებულ ინტერვიუს მოიცავს. საშუალო ცდომილების ზღვარი კვლევაში +/- 1,6 პროცენტია. NDI-ის კვლევა დიდი ბრიტანეთის მთავრობის UK aid-ის ფინანსური ხელშეწყობით ხორციელდება. კვლევა ჩატარებულია CRRC საქართველოს მიერ.