„სტრატეგია აღმაშენებლის“ სოციალური მიმართულების ხელმძღვანელი, თეონა ჭალიძე დიაბეტის მქონე ბავშვების მშობლებს სოლიდარობას უცხადებს და სამინისტროს უმოქმედობაში ადანაშაულებს. ამ განცხადებით ჭალიძე ჯანდაცვის სამინისტროსთან გამართულ საპროტესტო აქციას გამოეხმაურა.

„დღეს დიაბეტის მქონე ბავშვების მშობლებმა ჯანდაცვის სამინისტროსთან საპროტესტო აქცია გამართეს. მათი მოთხოვნები სრულიად ლეგიტიმურია. ისინი აპროტესტებენ იმას, რომ ქვეყანაში ინსულინის დეფიციტია. აუცილებლად უნდა გადაიდგას ნაბიჯები იმისთვის, რომ მოხდეს პრევენცია და მსგავსი პრობლემის წინაშე ადამიანები აღარ აღმოჩდნენ. პროგრამაში ჩართულ ბავშვებზე უნდა მოხდეს შესაბამისი ჩხირებისა და ნემსის თავების გაცემა. ჯანდაცვის სამინისტროს უპასუხიმგებლობის და გულგრილობის შედეგია დღეს არსებული მდგომარეობა. ნუთუ შეიძლება ბავშვების და არამარტო ბავშვების ასეთ სიტუაციაში ჩაგდება? ჯანდაცვის მინისტრმა წარმოიდგინოს თავი ამ ბავშვების მშობლების ადგილზე და იქნებ მიხვდეს, რომ ოპერატიულად მოაგვაროს მათი პრობლემა. ამ ბავშვებს არ აურჩევიათ ეს დაავადება და სახელმწიფო ვალდებულია იზრუნოს მათთვის შესაბამისი პირობების შექმნაზე და იმის ნაცვლად, რომ ამ სასოწარკვეთილ ადამიანებს დაელაპარაკონ, იმედი მისცენ და პრობლემის ოპერატიულად მოგვარებაზე იფიქრონ სამინისტროს წარმომადგენლებმა, მათ ეძიძგილავებიან, სამინისტროს ფოიეში არ უშვებენ და სრულიად სამარცხვინო სიტუაციაში იგდებენ თავს“, - განაცხადა თეონა ჭალიძემ.