ფინეთი და შვედეთი ნატოში ერთად შევლენ. ამის შესახებ ფინეთის პრემიერ-მინისტრმა სანა მარინმა შვედ კოლეგა ულფ კრისტერსონთან გამართულ ერთობლივ პრესკონფერენციაზე განაცხადა.

“ძალიან მნიშვნელოვანია, რომ დღეს მკაფიო სიგნალს ვაგზავნით. ფინეთმა და შვედეთმა ერთად გააკეთეს განაცხადები და ყველას ინტერესებშია, რომ ერთად შევიდეთ”, - განაცხადა მარინმა.

მან აღნიშნა, რომ არ მოსწონს დებატები, რომლებშიც შვედეთი პრობლემად განიხილება.

“შვედეთი არ არის პრობლემა. არ მომწონს, როდესაც შვედეთი როგორც კლასის მოუხერხებელი ბავშვი გამოყავთ”, - თქვა მარინმა და აღნიშნა, რომ შვედეთი “ნატოში წევრობის ყველა კრიტერიუმს აკმაყოფილებს”.

თავის მხრივ, კრისტერსონმა აღნიშნა, რომ ფინეთმა და შვედეთმა ერთად დაიწყეს ნატოსკენ გზა და ერთად გაივლიან ამ გზას.

“ვაფასებ ძალიან მკაფიო მესიჯებს ფინეთიდან, თქვენგან და პრეზიდენტ საული ნიინისტესგან იმის შესახებ, რომ ამ გზაზე ერთად ვართ”, - დასძინა კრისტერსონმა.

ცნობისთვის, დღეისთვის ნატოს 30 წევრი სახელმწიფოდან ალიანსში ფინეთისა და შვედეთის წევრობის რატიფიცირება მხოლოდ თურქეთმა და უნგრეთმა არ მოახდინეს. ამავდროულად, ბოლო დღეებში ანკარაში არაერთხელ გამოთქმულა აზრი, რომ სტოკჰოლმში ყურანის დაწვის გამო თურქეთს ფინეთის ნატოში გაწევრიანების რატიფიცირება შვედეთისგან ცალკე შეუძლია.