NDI-ის კვლევამ ნათლად დაგვანახა, რომ „ქართული ოცნების“ ანტიქართული, ანტიდასავლური და ანტიუკრაინული პროპაგანდა რეალურად არ მუშაობს - მოსახლეობის უმეტესობას სურს ევროკავშირში ინტეგრაცია და მიაჩნია, რომ რუსეთი მტერია, - ამის შესახებ „სტრატეგია აღმაშენებლის“ ლიდერმა, გიორგი ვაშაძემ განაცხადა.
მისივე თმით, საქართველოს მოქალაქეებმა კარგად იციან, რომ ომი უკრაინაში პუტინის რუსეთმა დაიწყო, რუსეთი არის აგრესორი და უკრაინას მხარს უჭერენ.
ვაშაძის განცხადებით, მოსახლეობის დიდი უმრავლესობა მხარს უჭერს საქართველოს ნატო-სა და ევროკავშირში გაწევრიანებას, რაც კიდევ ერთხელ ადასტურებს, რომ ევროპა არის ჩვენი ისტორიული არჩევანი და ეს ვერ შეიცვლება.
„მიუხედავად იმისა, რომ „ქართული ოცნება“ აშკარა ღალატის გზას დაადგა, მათ ვერ შეძლეს საქართველოს ევროკავშირში გაწევრიანების მომხრეთა არჩევანის შეცვლა. უფრო მეტიც, ნატო-ში გაწევრიანების მომხრეთა რაოდენობა სტაბილურად მაღალია, ხოლო ევროკავშირის მხარდამჭერთა რაოდენობა, წინა კვლევასთან შედარებით, კიდევ უფრო გაიზარდა.
მოსახლეობის უმრავლესობა მიიჩნევს, რომ რუსეთი მტერია. მმართველი ძალის მხრიდან საპირისპიროს მტკიცების მიუხედავად, აღნიშნულ საკითხთან მიმართებითაც არ შეცვლილა საზოგადოების დამოკიდებულება, უფრო მეტიც, გამოკითხულთა თითქმის 70% მიიჩნევს, რომ რუსეთის მოქალაქეებისთვის სავიზო რეჟიმის შემოღება საჭიროა. ასევე, გამოკითხულთა 70% აცხადებს, რომ ხელისუფლება ან არაფერს აკეთებს ევროკავშირში ინტეგრაციისთვის, ან რასაც აკეთებს არასაკმარისია.
ეს ყველაფერი ერთი დასკვნის გაკეთების შესაძლებლობას გვაძლევს - მოსახლეობის უმეტესობას სურს ევროკავშირში ინტეგრაცია და მიაჩნია, რომ რუსეთი მტერია. ასევე, თვლიან, რომ „ქართული ოცნება“ დასავლეთში ინტეგრაციისთვის ფაქტობრივად არაფერს აკეთებს.
იმისთვის, რომ საზოგადოების ეს განწყობა ოპოზიციური პარტიების რეიტინგში გარდაისახოს, საჭიროა, ჩვენ ადამიანებს მათთვის პრობლემატური საკითხების გადაჭრის გზებზე ვესაუბროთ. თითოეულმა ადამიანმა უნდა დაინახოს, რომ ჩვენ გვაქვს კონკრეტული გეგმები, რომლებიც მათ პრობლემებს მოაგვარებს.
კვლევა ასევე მიუთითებს, რომ უფრო მეტი დრო უნდა დავუთმოთ იმ პრობლემებისა და საკითხების გადაწყვეტას, რაც ჩვენს მოქალაქეებს ყოველდღიურად აწუხებს. არ უნდა მივცეთ „ქართული ოცნების“ პროპაგანდას შესაძლებლობა, რომ მთავარი საკითხებიდან ყურადღება მეორეხარისხოვან საკითხებზე გადავიტანოთ,” - განაცხადა გიორგი ვაშაძემ, რომლის კომენტარსაც „სტრატეგია აღმაშენებელი“ ავრცელებს.