ვთხოვ ხელისუფლებას, ქილიკისა და შეურაცხმყოფელი განცხადებებისგან თავი შეიკავოს, ვინაიდან, ოჯახი, საზოგადოება მართლა ძალიან მძიმე მდგომარეობაში ვიმყოფებით, როდესაც ოჯახის წევრი ჩვენ ასე ხელიდან გვეცლება , - ამის შესახებ საქართველოს მესამე პრეზიდენტის ძმამ, გიორგი სააკაშვილმა განაცხადა, რითაც შეაფასა მმართველი გუნდის წევრების მხრიდან გაკეთებული განცხადებები, რომ მიხეილ სააკაშვილი თვითდაზიანების რეჟიმში იმყოფება.

მისივე თქმით, მიხეილ სააკაშვილი მოწამლულია და მისი მძიმე მდგომარეობა სწორედ აქედან არის გამოწვეული.

"სახელმწიფოს, ჩინოვნიკების მხრიდან ქილიკი, შეურაცხმყოფელი განცხადებები გრძელდება. მართლა ვერ ვხვდები როდემდე უნდა გრძელდებოდეს მსგავსი განცხადებები. კიდევ ერთხელ აღვნიშნავ, მიშა სააკაშვილი ჩამოვიდა აბსოლუტურად ჯანმრთელი და დღეს 68 კილომდეა. კიდევ ერთხელ გავუსვამ ხაზს, რომ მიშა სააკაშვილი საქართველოში არის მოწამლული. მე ვერ დაგიდასტურებთ, სად მოხდა კონკრეტულად, მაგრამ ფაქტია, რომ მიშას ასეთი მდგომარეობა მოწამვლიდან არის გამოწვეული. ამიტომ მე ვთხოვ ხელისუფლებას, მსგავსი განცხადებებიდან თავი შეიკავოს, ვინაიდან ოჯახი, საზოგადოება მართლა ძალიან მძიმე მდგომარეობაში ვიმყოფებით, როდესაც ოჯახის წევრი ჩვენ ასე ხელიდან გვეცლება. რა ვუპასუხო არც ვიცი", - განაცხადა გიორგი სააკაშვილმა.