ირაკლი ღარიბაშვილმა, იუსტიციის მინისტრმა, ჯანდაცვის მინისტრმა, ყველა იმ ადამიანმა, ვინც მონაწილეობდა და მონაწილეობს პრეზიდენტ სააკაშვილის წამებაში და არაადამიანურ მოპყრობაში, უნდა იცოდეს, რომ პასუხი ყოველ მიზეზ გარეშე მოეთხოვება , - ამის შესახებ "ნაციონალური მოძრაობის" თავმჯდომარემ, ლევან ხაბეიშვილმა თბილისის საქალაქო სასამართლოსთან განაცხადა.

მისივე თქმით, "ეს ადამიანები პასუხისმგებლობას ვერ გაექცევიან და ყველა სისხლის სამართლებრივ პასუხისგებაში იქნება მიცემული".

ლევან ხაბეიშვილის განცხადებით, მნიშვნელოვანია, რომ საქართველოს მესამე პრეზიდენტის სასჯელის გადავადებაზე ან სასჯელისგან გათავისუფლების საკითხზე პროცესები მალე დასრულდეს.

"ჩვენ ვხედავთ საერთაშორისო გამოხმაურებას პრეზიდენტ სააკაშვილის სიცოცხლის საფრთხესთან დაკავშირებით, ამიტომ ყველაზე მნიშვნელოვანია, ახლა ეს პროცესები კიდევ არ გაიწელოს. რუსული რეჟიმი ჩვენდა სამწუხაროდ, ამ პროცესებს დეკემბრიდან წელავს და მნიშვნელოვანია, რომ სწრაფად დასრულდეს. ყველა დოკუმენტაცია, ყველა მტკიცებულება არსებობს იმისთვის, რომ კანონის შესაბამისად მიიღოს სასამართლომ გადაწყვეტილება, თუ ეს გადაწყვეტილება ცხადია, სამართლიანი იქნება", - განაცხადა ხაბეიშვილმა.