საქართველოსა და რუსეთს შორის ფრენების აღდგენასთან დაკავშირებით ამერიკის სახელმწიფო დეპარტამენტის განცხადება არის პასუხი რუსეთის ინიციატივასა და განცხადებაზე,- ამის შესახებ ჟურნალისტებთან პარლამენტის ვიცე- სპიკერმა არჩილ თალაკვაძემ განაცხადა.

როგორც მან აღნიშნა, საქართველოსთან მიმართებით ამერიკის მთავრობას მკაფიო პოზიცია აქვს, რომ საქართველო არ არღვევს სანქციებს.

"საქართველომ ამაზე პოზიცია დააფიქსირა, ეს არ არის არც საქართველოს გადაწყვეტილება და არც ის, რაც საქართველომ მოითხოვა. რუსეთს ცალმხრივად შეზღუდული და დაბლოკილი ჰქონდა ფრენები და განცხადება ისევ რუსეთმა გააკეთა. შესაბამისად, აშშ- ის სახელმწიფო დეპარტამენტის განცხადება არის პასუხი რუსეთის ინიციატივასა და რუსეთის განცხადებაზე. რაც ჩვენ გვეხება, ჩვენთან მიმართებით აშშ- ის მთავრობამ ცალსახად განაცხადა, რომ საქართველო არ არღვევს სანქციებს. საქართველო არც მომავალში არ დაარღვევს სანქციების რეჟიმს, რადგან ჩვენი ადგილი არის ევროპულ ოჯახში და ჩვენი პარტნიორია დასავლეთი,"-განაცხადა თალაკვაძემ.

ინფორმაციისთვის, ამერიკის შეერთებული შტატების სახელმწიფო დეპარტამენტის განცხადებით, საქართველოსა და რუსეთს შორის ფრენების აღდგენა სანქციების საფრთხეს შეუქმნის კომპანიებს, რომლებიც საქართველოს აეროპორტებში რუსულ კომპანიებს მოემსახურება.