ტყუილ-მართალი ერთმანეთში იხარშება. არა მხოლოდ შიგნით, მიხეილ სააკაშვილის დამცველებშია არასწორი პოზიციები, არამედ მთელს ევროპასაც კი ტყუილში ვაცხოვრებთ , - ამის შესახებ პარტია „გირჩის“ ლიდერმა, იაგო ხვიჩიამ „პალიტრანიუსის“ გადაცემა „დღის ნიუსრუმში“ საქართველოს მესამე პრეზიდენტის მიხეილ სააკაშვილის ჯანმრთელობის მდგომარეობის შესახებ საუბრისას განაცხადა.

იაგო ხვიჩიას თქმით, არსებულ ვითარებაში გამოსავალი არის „ბრძოლის დამთავრება“.

„მიშა არ არის მთავარი თემა ქვეყანაში. მიშაზე ასეთი ტიპის ყურადღებით მიშას ინტერესსაც ყველაზე მეტად აზიანებენ. რომ არა ასეთი ისტერიკა და სხვანაირი დამოკიდებულება ყოფილიყო, ბევრად უფრო მარტივი იქნებოდა მიხეილ სააკაშვილის გათავისუფლებისთვის ბრძოლაც, მაგრამ მედიამ ჩაითრია მიხეილ სააკაშვილი და მიხეილ სააკაშვილმა მედია ერთ დიდ ტყუილში, სადაც ტყუილ-მართალი ერთმანეთში იხარშება და არა მხოლოდ შიგნით, მიხეილ სააკაშვილის დამცველებშია არასწორი პოზიციები, არამედ მთელს ევროპასაც კი ტყუილში ვაცხოვრებთ, რაც მგონი ყველასთვის უკვე თვალნათელია.

გამოსავალი არის ბრძოლის დამთავრება. ბრძოლის დამთავრების წინაპირობა რა შეიძლება იყოს? - „ოფისს გადავუფორმებთო რუსულ ოცნებას“ კი არა, რომელიც არაფერში წერია, არც სერიოზულია, არც სწორი. სერიოზულიც რომ იყოს, „რუსული ოცნება“ თუ გგონია, რუსეთს რატომ ნებდები? - მიხეილ სააკაშვილის გამო, როგორ შეიძლება რუსეთს დანებდე“, - განაცხადა იაგო ხვიჩიამ.

იაგო ხვიჩიამ გადაცემაში „ნაციონალურ მოძრაობაში“ თავმჯდომარის არჩევნების საკითხიც შეაფასა და აღნიშნა, რომ მიხეილ სააკაშვილმა თავისუფლების სანაცვლოდ პარტია დათმო.

„ერთადერთი საღი აზრი ამ არჩევნებში არის ის, რომ მიხეილ სააკაშვილმა თავისუფლების სანაცვლოდ დათმო პარტია. დღეს „ქართული ოცნებისთვის" საფრთხეს არ წარმოადგენს. „ოცნებას“ დაუთმო პარტია, რომ მისთვის საფრთხეს არ წარმოადგენდეს, ასეთი გადაწყვეტილება იქნა მიღებული, ჩემთვის დიდი მნიშვნელობა არ აქვს.

ისე, როგორც ჩატარდა არჩევნები, ისე, როგორც გაირკვა სინამდვილეში, ვინ დგას „ნაცმოძრაობის“ უკან, მაგ პარტიას არანაირი პერსპექტივა არ აქვს. „მოდი, ასე გავაკეთოთ „ნაცმოძრაობის“ არჩევნები და მიშას გავუშვებთ“, თუ ეს პირობა არსებობს „ნაცებსა“ და „ქოცებს“ შორის, მაშინ ცოტა ხანში საერთოდ დაიშლება „ნაცები“. რადგან მიშა ცოტა ხანში მიხვდება, რომ მას პარტია წაართვეს და როგორც კი ამას მიხვდება, მე ვურჩევ, რომ „ფსონი“ "გირჩზე" დადოს და ჩვენს პროექტებს დაუჭიროს მხარი, მიშა მინდა მხარდამჭერად“, - განაცხადა იაგო ხვიჩიამ.